යාපනය චාවකච්චේරියෙන් හමු වූ ආයුධ කොළඹට ගෙන ඒමට තිබූ ඒවා බවට තොරුතරු ඇතැයි පාර්ලිමේන්තු මන්ත්‍රී ජී ඇල් පීරිස් පෙරදින මාධ්‍ය සාකච්ඡාවක දී කළ ප්‍රකාශය ගැන පරීක්ෂණ පවත්වා ඔහු දන්නා තොරතුරු ලබා ගන්නා ලෙස ජනමාධ්‍ය ඇමැති ගයන්ත කරුණාතිලක මහතා ආරක්ෂක ලේකම්ගෙන් ඉල්ලීමක් කළේය.
යුද්ධයෙන් පසු මෙවැනි දෑ මීට පෙරද හමුවුවද පීරිස් මහතා ඒ ගැන කිසිවක් කියා නැති බවත්, එසේ කියනුයේ ඔහු මෙම සිද්ධිය හොඳ හැටි දන්නා නිසා විය හැකි බවත්, ඔහු දන්නා තොරතුරු ලබා ගැනීම විමර්ශනවලට ද සහායක් වනු ඇති බවත් කරුණාතිලක මහතා කීවේය.
පීරිස් මහතාගෙන් ප්‍රකාශයක් ගැනීමට සිදුවනු ඇතැයි ආරක්ෂක ලේකම් කරුණාසේන හෙට්ටිආරච්චි මහතා කීවේය.
‘බලධාරීන් මර නින්දේ යැයි සමහරුන් කියනවා. ජාතික ආරක්ෂාවට තර්ජනයක් යැයි සමහරුන් කියනවා. බලධාරීන් මර නින්දේ හිටියා නම් මෙවැනි දේ හමු වෙන්නේ නැහැනේ. බුද්ධි අංශ, පොලිසිය, හමුදාව සහ සියලු වගකිවයුතු පාර්ශ්ව හොඳ අවධානයෙන් හා අවදියෙන් ඉන්නවා. ජාතික ආරක්ෂාවට තර්ජනයක් වෙන්න දෙන්නේ නෑ.‘ යැයි ද හෙට්ටිආරච්චි මහතා පැවසීය.
රාජපක්ෂලාගේ පැවැත්ම රඳා පවතින්නේ මෙවැනි දෑ මත බවත්, යළි කළබව ඇති වෙයි කියා ඔවුන් බලා සිටියත් එවැනි දේට යළි ඉඩක් නොලැබෙන බවත් රාජ්‍ය ඇමැති සුජීව සේනසිංහ මහතා කීවේය.
(වීඩියෝ කෞෂල්‍ය සමින්ද)
