ඉංග්‍රීසි භාෂාව පිළිබඳ සුප්‍රකට මහාචාර්ය ඈෂ්ලි හල්පේ මහතා පෙරේදා (14) අභාවප්‍රාප්ත වූයේය.
අසනීප තත්ත්වයක් හේතුවෙන් පේරාදෙණිය ශික්ෂණ රෝහලට ඇතුළත් කිරීමෙන් පසු මහාචාර්යවරයා අභාවප්‍රාප්ත වූ අතර මියයන විට ඔහු 83 වියෙහි පසුවිය.
ඈෂ්ලි හල්පේ මහතා ඉංග්‍රීසී භාෂාව පිළිබඳ මහාචාර්යවරයකු බවට පත්වන විට ඔහුගේ වයස අවුරුදු 31 ක් වූ අතර එවකට එසේ පත්වූ ළාබලතමයා වූයේ ද ඔහුය.
මහාචාර්ය ඈෂ්ලි හල්පේ මහතා පේරාදෙණිය විශ්ව විද්‍යාලයේ ශාස්ත්‍ර පීඨයේ පීඨාධිපති තනතුර ඇතුළු තනතුරු රැසක කටයුතු කර ඇති අතර විදේශ විශ්ව විද්‍යාල රැසක ආරාධිත මහාචාර්යවරයකු ලෙස ද කටයුතු කර ඇත.
ඉංග්‍රීසි භාෂාව ඉගැන්වීමට අමතරව ඔහු නාට්‍ය හා රංග කලාව, සංස්කෘතික අධ්‍යයනය ආදී ක්ෂේත්‍රවලට ද සුවිශේෂී මෙහෙවරක් ඉටු කළේය.
මහාචාර්වරයාගේ දේහය අඟහරුවාදා (17) පේරාදෙණිය විශ්ව විද්‍යාලයේ ශාස්ත්‍ර පීඨයට රැගෙන එන අතර දේහය පිළිබඳ අවසන් කටයුතු එදින සවස තුනට මහයියාව සුසාන භූමියේදී සිදු කෙරෙනු ඇත.
