මාලඹේ පෞද්ගලික විශ්ව විද්‍යාලයෙන් පිටවන වෛද්‍ය උපාධිධාරීන්ට රජයේ වෛද්‍යවරුන් ලෙස බඳවා ගැනීමේ හැකියාව සොයා බලන ලෙස ශ්‍රේෂ්ඨාධිකරණය අද (06) නීතිපතිවරයාට උපදෙස් ලබා දුන්නේය.
වෛද්‍ය උපාධිධාරීන් රාජ්‍ය සේවයට අන්තර් ගහණය කිරීම ගැන 2014.10.11 දින නිකුත් කළ ගැසට් මගින් ප‍්‍රසිද්ධ කළ සෞඛ්‍ය සේවා සටහන් වෙනස් කිරීමේ හැකියාවක් තිබේද යන්න සොයා බලන ලෙසද ශ්‍රේෂ්ඨාධිකරණය නීතිපතිට දැනුම් දුන්නේය.
ශ්‍රේෂ්ඨාධිකරණය මෙම දැනුම් දීම් සිදු කරනු ලැබුවේ තමන්ද රජයේ වෛද්‍යවරුන් ලෙස බඳවා ගන්නා ලෙස ඉල්ලා මාලඹේ පෞද්ගලික වෛද්‍ය විද්‍යාලයේ සිසුන් තිදෙනෙකු ගොනු කළ මූලික අයිතිවාසිකම් පෙත්සමක් කැඳවූ අවස්ථාවේදීය.
මෙම පෙත්සම අගවිනිසුරු කේ.ශ්‍රී පවන් සහ විනිසුරු අනිල් ගුණරත්න මහත්වරුන් හමුවේ කැඳවන ලදී.
මෙම පෙත්සමේ සඳහන් වන්නේ වෛද්‍ය උපාධිධාරීන් රාජ්‍ය සේවයට අන්තර් ග‍්‍රහණය කිරීම ගැන සෞඛ්‍ය සේවා සටහන් 2014 ඔක්තෝබර් 11 වැනිදා නිතුත් කර ඇති අතර රාජ්‍ය විශ්ව විද්‍යාල සහ විදෙස් විශ්ව විද්‍යාල උපාධිධාරීන් ඇතුළත් කර ගැනීමට අදාළ කරුණු එහි ඇතුළත් වන අතර උපාධි ප‍්‍රදානය කිරීමේ ආයතන ඊට අදාළ නොවන බවය.
උපාධි ප‍්‍රදානය කිරීමේ ආයතනයක් වන සයිටම් ආයතනයේ උපාධි ලබන උපාධිධාරීන්ට රාජ්‍ය සේවයට ඇතුළුවීමේ අවස්ථාව එමඟින් අහිමිවන බවද එහි සඳහන් වේ.
එබැවින් එම සෞඛ්‍ය සේවා සටහන් බල රහිත කර තමන්ටද රජයේ සේවයට ඇතුළු වීමේ අවස්ථාව ලබා දෙන ලෙස පෙත්සම්කරුවෝ ශ්‍රේෂ්ඨාධිකරණයෙන් ඉල්ලා සිටිති.
කරුණු සලකා බැලූ අධිකරණය පෙත්සම ලබන ජූලි 05 වැනි දින කැඳවීමට නියම කළේය.
ජනාධිපති නීතීඥ පාලිත ප‍්‍රනාන්දු මහතා පෙත්සම්කරුවන් වෙනුවෙන්, නීතිපතිවරයා වෙනුවෙන් රජයේ නීතීඥ ෆරීඩා බාරි මහත්මිය පෙනී සිටියහ.
