ජනාධිපති මහජන සම්බන්ධතා ඒකකය බාරව සිටි ජනාධිපති අතිරේක ලේකම් එස් ටී කොඩිකාර මහතා ගාල්ල මහ දිසාපති ලෙස ජනපති විසින් පත්කරනු ලැබ සිටියි.කොඩිකාර මහතා අද උදෑසන ගාල්ල දිස්ත්‍රික් ලේකම් කාර්යාලයේ දී සිය නව ධූරයේ කටයුතු ආරම්භ කළේය.
ගාල්ල බටපොලදී උපත ලද කොඩිකාර මහතා කොළඹ විශ්ව විද්‍යාලයේ උපාධිධාරියෙකි. අධ්‍යාපන පරිපාලන සේවයට එක්ව නියෝජ්‍ය විදුහල්පතිවරයෙකු ලෙස සේවය කළ ඒ මහතා පසුව රාජ්‍ය පරිපාලන සේවයට එක් වූයේය. ආර්ථික විද්‍යාව පිළිබඳවත් තොරතුරු තාක්ෂණය පිළිබඳවත් පළාත් පාළනය පිළිබඳවත් පශ්චාද් උපාධි තුනක් කොඩිකාර මහතාට ඇත.
එම ධූරයට පත්වීමට පෙර ඔහු පුත්තලම සහකාර ප්‍රාදේශීය ලේකම්වරයා ලෙසත් රාජ්‍ය පරිපාලන අමාත්‍යාංශයේ ලේකම්වරයෙකු ලෙසත් භාණ්ඩාගාර දෙපාර්තමේන්තුවේ ලේකම්වරයා ලෙසත් බස්නාහිර පළාත් වැඩබලන ප්‍රධාන ලේකම් ලෙසත් කටයුතු කර තිබුණි. තොරතුරු තාක්ෂණය පිළිබඳ හසල දැනුමකින් යුතු ඒ මහතා ජනපතිට කියන්න සේවාව ආරම්භ කිරීමට පසුගිය කාළයේදී විශාල කාර්යය භාරයක් ඉටු කළේය. එම සේවාව යටතේ දිවයිනේ සියළුම රාජ්‍ය ආයතන රාජ්‍ය සේවයේ ගැටළු විසඳීම සඳහා තොරතුරු තාක්ෂණ ක්‍රමවේදය හඳුන්වා දීමටද කොඩිකාර මහතා මූලික වී කටයුතු කළේය.
ගාල්ල හිටපු දිසාපති රවීන්ද්‍ර හේවාවිතාරණ මහතා අමාත්‍යාංශ ලේකම් ධූරයක් ලැබීමෙන් පසු අද දිනය දක්වාම මාස අටක කාළයක් ගාල්ල දිසාපති තනතුර හිස්ව තිබිණි. එම කාළයේදී අතිරේක දිස්ත්‍රික් ලේකම් මාලනී ලොකුපෝතාගම මහත්මිය අදාල ධූරයේ වැඩ ආවරණය කළාය.
