මධ්‍යම පළාත් ආණ්ඩුකාරවරිය නිලූකා ඒකනායක මහත්මිය සම්බන්ධයෙන් කඩිනම් තීරණයක් ගන්නැයි අස්ගිරි පාර්ශවයේ අනුනායක වෙඬරුවේ උපාලි හිමියන් ධීවර ඇමැති මහින්ද අමරවීර හා සමාජ සුබ සාධන අමාත්‍ය එස්.බී.දිසානායක මහත්වරුනට මහනුවරදී පැවසූ බව දැනගන්නට ඇත.
මාධ්‍යවේදීන් පිටත් කර යැවීමෙන් පසුව ඇමැතිවරුනට මේ බව පවසා ඇත. ආණ්ඩුකාරවරිය සම්බන්ධයෙන් පෞද්ගලික ප්‍රශ්නයක් තමන්ට නැති බවත් දළඳා මාළිගාව හා අස්ගිරි මල්වතු මහ නායක හාමුදුරුවන් ඇතුළු සංඝයා සමග ද මධ්‍යම පළාතේ ආණ්ඩුකාරවරියට වැඩ කිරීමට සිදුවන බැවින් ඒ සඳහා කාන්තාවක් පත් කිරීම නුසුදුදු බව සිතන බවත් අස්ගිරි පාර්ශවය සඳහන් කර ඇත.
අස්ගිරි අනුනායක වරකාගොඩ ධම්මරතන ,මහියංගන රජමහා විහාර බාරකාර උරුලෑ වත්තේ ධම්මරක්ඛිත නාහිමි, අස්ගිරි ලේඛකාධීකාරී ආණමඩුවේ ධම්මධස්සි හිමි,ගල්ලෑල්ලේ සද්ධාතිස්ස නාහිමි හිමිවරුන් එම සාකච්ඡාවට සහභාගී වූහ.
සුදුසු කෙනකු ආණ්ඩුකාර පදවියට පත් කරන ලෙස අස්ගිරි සංඝරත්නය ඉල්ලා සිටි බවද වාර්තාවේ.
මේ අතර මල්වතු මහ නාහිමියන් බැහැ දැකීමට ගිය ආණ්ඩුකාරවරිය මාධ්‍යවේදීන්ගේ ප්‍රශ්න වලට උත්තර දුන්නාය.
මාධ්‍යවේදියෙක් - ඔබතුමියගේ කිසියම් ශාරීරික වෙනසක් ගැන සමාජ මාධ්‍යවල ප්‍රචාරයක් යනවා.
ආණ්ඩුකාරවරිය - ස්වභාව ධර්මයේ සිදුවූ දෙයක් ගැන ඒ විදියට කථා කිරීම ගැන මටත් ලැජ්ජයි. මම දැන් එක්දරු මවක්. දේශපාලන වාසි ගන්න ඇතැම් අය එම ප්‍රචාර ගෙනියනවා. මේක විශාල දේශපාලන හස්තයක් කරන වැඩක්.
නව ආණ්ඩුකාරවරිය අද පස්වරු 2ට පමණ අස්ගිරි විහාරයට ගොස් අනුනායක හිමිවරුන්ගේ ආශිර්වාද ලබා ගත්තාය.
ශ්‍රි ලංකා නිදහස් පක්ෂ ලේකම් මහින්ද අමරවිර හා එස් බි දිසානායක අමාත්‍ය වරු අස්ගිරි මහා විහාරීය මංගල උපෝසථාගාරයේදි අස්ගිරි පාර්ශවයේ අනුනායක හිමිවරුන් බැහැ දැක ආශිර්වාද ලබා ගත්හ. උන් වහන්සේලා ප්‍රකාශ කර සිටියේ ප්‍රධාන පක්ෂ එකතු වි රට පාලනය කරගෙන යෑම රටේ දියුණුවටත් සාමයටත් මහා මෙහෙයක් කළ හැකි බවයි. ඒ සදහා අස්ගිරි පාර්ශවයේ සම්පූර්ණ ආශිර්වාදය ලැබෙන බවත් අස්ගිරි පාර්ශවයේ අනුනායක හිමිවරු සහ කාරක සංඝ සභාවේ හිමිවරු පැවැසුහ.
එස් බි දිසානායක අමාත්‍ය වරයා විසින් ඒ අවස්ථාවේදි අස්ගිරි පාර්ශවයේ අනු නාහිමිවරුන් සමග පෞද්ගලික සාකච්ඡාවක් සදහා මාධ්‍ය වේදීන්ට ඉවත් වන්නය කීවේය. මාධ්‍යවේදිහු එළියට ගියහ.
ජාතික වස්තුවක් වු මහනුවර ශ්‍රි දලදා මාලිගාවේ යම් යම් කටයුතු වලට පළාතේ ආණ්ඩුකාර වරියට සහභාගි විමට ද සියලු දේවාල ආදී කටයුතු සදහාද ඇයට සහභාගි විමට සිදුවන බවත් අස්ගිරි හිමිවරුන් කියා ඇත. කාන්තාවකට සහභාගි විය නොහැකි අවස්ථා ඇතිවන බවත් එහිදි අසරණ වන්නේ අන් කිසිවෙකු නොව වත්මන් ආණ්ඩුකාරවරිය බවත් ඒ හිමිවරු කීහ.
වත්මන් ආණ්ඩුකාරවරිය කෙරෙහි ද්වේශයෙන් මේ බව සැළ නොකරන බවත් මහනුවර මාලිගාව දේවාල ආදියෙහි චාරිත්‍ර වලට කාන්තාවන්ගේ සහභාගිත්වයක් ඇතිව කිරිමේ අපහසුවක් ඇතිබවත් හිමිවරුන් පවසා ඇත.
නනදිමිත්‍ර ඒකනායක, තිලිණ බණ්ඩාර තෙන්නකෝන්,මානෙල් බණ්ඩාර ඊට සහභාගි වුහ.
ඡායාරූප හා වීඩියෝ - චමිල් රූපසිංහ
