ගෘහස්ථ සේවකයන් බඳවා ගන්නා මිනිස්බල ආයතන ශ්‍රේණිගත කිරීමේ නීති කෙටුම්පත් කිරීම සඳහා විශේෂ කමිටුවක් පත්කිරීමට රජය තීරණය කර ඇති බව කටාර් පුවත් ඒජන්සිය වාර්තා කරයි.
එසේම මෙම කමිටුව මගින් බඳවා ගැනීමේ ක්‍රියාවලිය වේගවත් කිරීම, බඳවා ගැනීමේ ගාස්තු පහළ දැමීම සහ ගෘහස්ථ සේවකයන්ගේ පරිවාසකාලය වැඩි කිරීම සඳහාද යාන්ත්‍රණයක් සකස් කරනු ඇත.
පරිපාලන සංවර්ධන, කම්කරු සහ සමාජ කටයුතු ආමාත්‍ය ආචාර්ය ඉසා බින් සාද් ජෆාලි අල් නුඅයිමි, කටාර් වාණිජ මණ්ඩලයේ සභාපති ෂෙයික් කාලීෆා බින් ජාසිම් බින් මොහොමඞ් අල් තානි, අභ්‍යන්තර අමාත්‍යාංශයේ දේශසීමා, ගමන් බලපත්‍ර සහ ප්‍රවාසික කටයුතු දෙපාර්තමේන්තුවේ සහකාර අධ්‍යක්ෂ බි්‍රගේඩියර් මොහොමඞ් අහ්මඞ් අල් අටික් සහ මිනිස්බල නියෝජිතායතන මෙහෙයුම්කරුවන්ගේ සහභාගිත්වයෙන් කටාර් වාණිජ මණ්ඩලයේදී පැවැති සාකච්ඡාවකදී ඉහත තීරණය ගෙන ඇත.
මිනිස්බල නියෝජිතායතනවල නියෝජිතයන් සමග පැවැති සාකච්ඡාවකින් අනතුරුව ඉහත කාරණය සම්බන්ධයෙන් කමිටුවක් පත්කිරීමට රැස්වීමේදී තීරණය කළ බව කටාර් පුවත් ඒජන්සිය පවසයි.
බඳවාගැනීමේ පමාව සහ ගාස්තු ඉහළ යාම සම්බන්ධයෙන් පුරවැසියන් සමාජජාල සහ දේශීය මාධ්‍ය ඔස්සේ මතු කළ ප්‍රශ්නවලට ප්‍රතිචාර දැක්වීමක් ලෙසින් ඉහත තීරණය ගෙන ඇත. මෙම කමිටුව අභ්‍යන්තර අමාත්‍යාංශය, විදේශ කටයුතු අමාත්‍යාංශය, පරිපාලන සංවර්ධන, කම්කරු සහ සමාජ කටයුතු අමාත්‍යාංශය, කටාර් වාණිජ මණ්ඩලය සහ මිනිස් බල ආයතන නියෝජනය කරන නියෝජිතයන්ගෙන් සමන්විත වෙයි.
