ශ්‍රී ලංකාවට එරෙහිව යුරෝපා සංගමය පනවා තිබූ මත්ස්‍ය තහනම සම්පූර්ණයෙන්ම ඉවත් කර ඇතැයි රජයේ ආරංචි කියයි.
පසුගිය අප්‍රේල් මාසයේදී යුරෝපා සංගමය මෙම තහනම ඉවත් කරන බව දැනුම් දී තිබූ අතර ඒ අනුව යුරෝපා රටවලට ශ්‍රී ලංකාවේ මත්ස්‍ය සම්පත අපනයනය කිරීමේ හැකියාව යළිත් හිමිවී ඇත.
මත්ස්‍ය තහනමට පෙර යුරෝපා රටවල් සඳහා ටූනා මසුන් අලෙවි කළ ප්‍රමුඛතම රටක් ලෙස ශ්‍රී ලංකාව කටයුතු කළේය.
ශ්‍රී ලංකාවේ ධීවරයන් ජාත්‍යන්තර ධීවර නීති උල්ලංඝනය කරන බව කියමින් 2014 ඔක්තෝබර් මාසයේ දී ශ්‍රී ලංකාවට එරෙහිව මෙම මත්ස්‍ය තහනම පැනවිණි.
එම තහනම ඉවත් කර ගැනීම සඳහා ධීවර සහ ජලජ සම්පත් අමාත්‍යංශය පසුගිය කාලයේදී යුරෝපා සංගමය සමග සාකච්ඡා කිහිපයක්ම පැවැත්වීය.
