රාජ්‍ය නාට්‍ය සම්මාන උළෙල 2016 කොළඹ බස්නාහිර පළාත් සෞන්දර්ය නිකේතයේදී අද පැවති අතර මෙවර එය පැවැත්වුණේ කලාකරුවන්ගේ නිහඩ විරෝධතා මධ්‍යයේය.
මෙවර රාජ්‍ය නාට්‍ය උළෙලට අවශ්‍ය රාජ්‍ය අනුග්‍රහය නිසි පරිදි නොලැබුණු බව කියමින් ඊට සහභාගී වූ කලාකරුවන් සම්මාන උළෙළ අතරතුර වේදිකාවට ගොඩවී විරෝධතා පාඨ සහිත පුවරු ප්‍රදර්ශනය කරමින් නිහඩ විරෝධතාවන්හි නිරත වනු දක්නට ලැබිණි.
රාජ්‍ය නාට්‍ය උළෙලක මෙවැන්නක් සිදුවූයේ ඉතිහාසයේ පළමු වරට බව වාර්තා වේ.
පසුගිය වසරවලදී සංස්කෘතික අමාත්‍යාංශයේ අනුග්‍රහය යටතේ පැවැති රාජ්‍ය නාට්‍ය උළෙල මෙවර අධ්‍යාපනයට අමාත්‍යාංශයට පැවරී තිබූ අතර එයට ප්‍රමාණවත් මුදල් ප්‍රතිපාදන වෙන් කර නොතිබූ බව පවසමින් එම කලාකරුවෝ සටන් පාඨ සහිත පුවරු ප්‍රදර්ශනය කරමින් නිහඩ විරෝධතාවයේ නිරත වූහ.
‘රාජ්‍ය මෙච්චර පීචං ද මචං‘, ‘ ජනාධිපතිතුමනි සංස්කෘතික ජීවිතේ කියලා දේකුත් තියනවා‘, ‘අධ්‍යාපන ඇමතිතුමනි, නාට්‍ය අදාළ නැහැනේ‘ ආදී සටන්පාඨ එම පුවරුවල සදහන්ව තිබිණි.
රංගන ශිල්පීන් වන නාමල් ජයසිංහ, ජගත් මනුවර්ණ සහ ජෙහාන් ශ්‍රී කාන්තන් යන මහත්වරු සම්මාන උළෙලේ නිවේදක දෙපල පසකට කර තම විරෝධතාවට හේතු වන කරුණු ගැන සභාව දැනුවත් කළහ.
මෙයට සහභාගී වූ බොහෝ කලාකරුවන් ඇතුළු පිරිස් සම්මාන උළෙලට පැමිණියේ ද අත්වල කළු පටි බැඳගෙනය.
රාජ්‍ය නාට්‍ය උළලේ ප්‍රධාන ආරාධිතයා ලෙස සහභාගීවීමට නියමිතව සිටි අධ්‍යාපන අමාත්‍ය අකිල විරාජ් කාරියවසම් මහතා උළෙලට පැමිණ නොසිටි අතර සම්මාන ප්‍රදානෝත්සවයට ප්‍රවීණ නාට්‍යවේදී නිශ්ශංක දිද්දෙණිය හා ආචාර්ය චන්ද්‍රගුප්ත තේනුවර යන මහත්වරුන්ගේ ප්‍රධානත්වයෙන් පැවැත්විණි.
මෙම විරෝධතා දැක්වූ කලාකරුවන් අතර සිටි බොහොමයක් දෙනා වත්මන් රජය බලයට ගෙන ඒම වෙනුවෙන් කටයුතු කළ ‘අලූත් පරපුර‘ සංවිධානය නියෝජනය කළ කලාකරුවන්වීම විශේෂත්වයකි.
මේ වසරේ මුලදී රාජ්‍ය නාට්‍ය උළෙල වෙනුවෙන් සංස්කෘතික අමාත්‍යාංශයට මුදල් වෙන් කර තිබුණද පසුව එය අධ්‍යාපන අමාත්‍යාංශයට පැවරිණි.
රාජ්‍ය නාට්‍ය උළෙල මාර්තු මාසයේදී පැවැත්වීමට නියමිතව තිබුණත් එය නොපැවැත්වුණු අතර අද (1) දිනයේදී එය පැවැත්වූයේ නාට්‍යකරුවන්ගේ දැඩි වුවමනාව මත බව වාර්තා විය.
මෙවර රාජ්‍ය නාට්‍ය උළලේදී හොඳම නාට්‍යයට හිමි සම්මානය ‘රජා මං වහලා‘ නාට්‍යයට හිමි වූ අතර එහි අධ්‍යක්ෂ චාමික හත්ලහාවත්ත හොඳම අධ්‍යක්ෂණයට හිමි සම්මානය දිනා ගත්තේය.
හොඳම නළුවාට හිමි සම්මානය සරත් කරුණාරත්නට හා සනත් විමලසිරි ට හිමිවිය. හොඳම නිළියට හිමි සම්මානය තෙරු‚ අශංසා හා උමයංගනා වික්‍රමසිංහට හිමි විය. ඔවුන් සිව් දෙනාම මෙම සම්මාන ලැබූයේ ‘රජා මං වහලා‘ නාට්‍යයේ කළ රංගනයන් වෙනුවෙන්වීම විශේෂත්වයකි. ප්‍රධාන සම්මාන සියල්ලම පාහේ මෙම නාට්‍යයට හිමිවීම විශේෂත්වයකි.
මෙහිදී විරෝධතා දක්වමින් අදහස් දැක්වූ රංගන ශිල්පී ජෙහාන් ›කාන්තන් මහතා මෙසේ අදහස් දැක්වීය.
්ජනාධිපතිතුමනි, අගමැතිතුමනි, අපට ඇත්තේ වේදනාවක්. අප ගැන තීන්දු තීරණ ගැනීමට ඔබව පත් කළ අපට දැන් ඒ ගැන ඇත්තේ කණගාටුවක්, දුකක් හා වේදනාවකි. අපට අප ගැන තරහක් වේදනාවක් උපදිනවා. බොරු පොරොන්දු දුන් අය පිළිබඳ අපට ඇත්තේ අනුකම්පාවක්.
වෙනදාට රාජ්‍ය නාට්‍ය උළෙල සංවිධානය කරන්නේ සංස්කෘතික අමාත්‍යාංශය යටතේ පවතින ජාතික කලා මණ්ඩලයක් හා නාට්‍ය අනු මණ්ඩලයයි. මේ රජය පත්වීමත් සමඟ නාට්‍ය අනු මණ්ඩලය අධ්‍යාපන අමාත්‍යාංශයට පැවරෙනවා. එතකොට රාජ්‍ය නාට්‍ය උළෙල සංවිධානය වගකීම අධ්‍යාපනය අමාත්‍යාංශයට පැවරෙනවා. ඒත් සමඟ හුණුවටයේ කතාවේ වගේ අම්මලා දෙන්නෙක් මතු වෙනවා. සංස්කෘතික අමාත්‍යාංශයත් අධ්‍යාපන අමාත්‍යාංශයත් අතර කඹ ඇදිල්ලක් මතු වෙනවා.
මේ කිසිදු තීරණයක් ගත්තේ අපි නෙමෙයි. මේ තීරණ අපෙන් අහලා ගත්තු තීරණ නෙමෙයි. අපට අවශ්‍ය වන්නේ ගෞරවාන්විත රාජ්‍ය නාට්‍ය උළෙලක් පමණයි. ඒ දේ වෙනවානම් අපට කවුරු සංවිධානය කළත් කමක් නැහැ.් යැයි ද ඔහු ස`දහන් කළේය.
