චීනයේ රෝහලක හෙද නිලධාරියකු රෝගී කාන්තාවකට පහරදී ඇතැයිද එම දර්ශන රෝහල් කැමරාවක සටහන්වී ඇතැයිද ඩේලිමේල් පුවත් සේවය පවසයි.
චීනයේ මධ්‍යම හුනාන් ප්‍රාන්තයේ ලින්ලි රෝහලේ මෙම සිදුවීම වී ඇතැයි ද එම හෙද නිලධාරීයාගේ වැඩ තාවකාලිකව තහනම් කිරීමට රෝහල් බලධාරීහු කටයුතු කර ඇතැයිද කියති.
එම වාර්තාවන්ට අනුව රෝගී කත බීමට ජලය ඉල්ලා කිහිපවරක්ම දොරට තට්ටු කර ඇතැයිද එයට කෝපවූ හෙද නිලධාරියා ඇයට පහරදී ඇතැයිද කියති. හෙද නිලධාරියා ඇය රෝහලේ බිත්තියකට හේත්තු කර පහර දී ඇති අතර පා පහරද එල්ල කරමින් ඇය බිමට තල්ලි කර ඇති ආකාරය රෝහල් කැමරාවක සටහන්වී තිබේ.
රෝහල් කොරිඩෝවේ සිටින අනෙක් පිරිස් ඇයට පහරදෙන ආකාරය බලාසිටින දසුන්ද එහි සටහන්ව ඇත.
හෙද නිලධාරියා රෝගී කතට සාහසික ලෙස අතුල් පහර එල්ල කරන අයුරුද එහි දැක්වේ. රෝගී කත ඉදිරියට පැමිණ ඔහුට කථා කිරීමට උත්සාහ කළද ඔහු දිගින් දිගටම පහරදී ඇත.
චීන මාධ්‍ය වාර්තා කරන ආකාරයට එම කාන්තාව කිසියම් මානසික රෝගී තත්ත්වයකින් පසුවන්නියක් බවද පසුගිය දිනවල රෝහල් කාර්ය මණ්ඩලයට බැන වැදී ඇති බවද කියති. එම සිදුවීමෙන් පසු රෝගී කතට ප්‍රතිකාර ලබාදී ඇති අතර තවමත් ඇය ආබාධිත තත්ත්වයේ පසුවන බවද වාර්තා වේ.
