අයහපත් කාලගුණය හේතුවෙන් මෙරට විපතට පත්වූ වැසියන්ට ආධාර රැගත් ගුවන් යානා දෙකක් ඉන්දියාවේ හා ජපානයේ සිට අද (21) කටුනායක ජාත්‍යන්තර ගුවන්තොටුපළින් ශ්‍රී ලංකාවට පැමිණියේය.
ජපානයෙන් ලැබුණු ආධාර තොගයක් රැගත් එමිරේට්ස් ගුවන් යානයක්ද ඉන්දියාවේ ආධාර සහිත විශේෂ ගුවන් යානයක්ද එසේ ලංකාවට පැමිණි අතර ඒවායේ අත්‍යවශ්‍ය ආහාර ද්‍රව්‍ය මෙන්ම ජල පිරිසිදු කරන යන්ත්‍ර, විදුලි ජනන යන්ත්‍ර ආදිය ද ඇතුළත් බව කියති.
ඉන්දියා රජයෙන් පරිත්‍යාග කළ හාණ්ඩ තොගය ඉන්දියානු ශ්‍රී ලංකා මහකොමසාරිස් වයි.කේ.සිංග් අමාත්‍ය අනුර ප්‍රියදර්ශන යාපාට නිල වශයෙන් භාර දුන් අතර ගුවන් හමුදාපති ගගන් බුලත්සිංහල ගේ උපදෙස් මත කටුනායක මූලික කඳවුරේ අණදෙන නිලධාරි එයාර් කමාන්ඩෝ එච්.ඇම්.එස්.කේ.බී.කොටකදෙණියගේ අධික්ෂණයෙන් ත්‍රිවිධ හමුදා නිලධාරීන් එක්ව සහනාධාර භාණ්ඩ තොග කඩිනමින් අවැතැන්වූවන්ට ලබාදීමට කිරීමට කටයුතු කළ බව ගුවන් හමුදාව පැවසීය.
මේ අතර තවත් ආධාර තොගයක් ඉන්දියාවේ සිට මෙරටට නැවකින් එවීමට ඉන්දීය රජය පියවර නෙ ඇත. ඒ අනුව එම නැවද ශ්‍රී ලංකාවට ළඟාවීමට නියමිතය.
ඡායාරූප - ප්‍රසාද් මුතුකුඩ
