(අංජුල මහික වීරරත්න සහ සුජිත් හේවාජුලිගේ)
ලංකා ආර්ථිකය පහෙන් එකකින් සංකෝචනය වෙමින් තිබෙන බව කොළඹ දිස්ත්‍රික් මන්ත්‍රී පාඨලි චම්පික රණවක මහතා පාර්ලිමේන්තුවේ දී පැවසීය.
මෙය ඉතා භයානක තත්ත්වයක් යැයිද මෙි නිසා නව දුප්පතුන් පිරිසක් බිහි වෙමින් තිබෙනවා බවද කීය.
අද ඉන්ධන සඳහා සලාක ක්‍රමයක් තිබෙන අතර ඉන්ධන පරිභෝජනය සියයට 20-24කින් අඩු කර තිබෙන බවද මන්ත්‍රීවරයා කීය.විරැකියාව ඉතා බරපතළ ලෙස මතු වී තිබෙන අතර තවමත් එහි නිල සංඛ්‍යා ලේඛනයක් නැතැයි චම්පික රණවක මහතා පැවසීය.
ජාත්‍යන්තර මූල්‍ය අරමුදල සමඟ එළැඹුණ මාණ්ඩලික ගිවිසුම හෙළිදරව් කරන ලෙස පැවසුවත් ඊට විවිධ නීති තර්ක ඉදිරිපත් කර ඇතැයි කී චම්පික රණවක මහතා එමෙන්ම එය ඉතා සංවේදී කාරණයක් බව මතක් කළ යුතු බවද සඳහන් කළේය.
සේවක අර්ථසාධක අරමුදල් මුදල් රජය ණය ලෙස ලබාගෙන එය කාබාසිනියා කර තිබෙන බවත් මෙහෙම ගියොත් සේවක අර්ථසාධක අරමුදල බිඳ වැටෙනු ඇති බවත් රණවක මහතා කීය.
