පෞද්ගලික රෝහලකදී වෛද්‍යවරයෙකු විසින් රෝගියෙකු පරීක්ෂා කළ යුතු අවම කාලය විනාඩි 10ක් විය යුතු බවට දැනුම් දී ඇති අතර රෝගීන් පරීක්ෂා කිරීමට ලබාගන්නා මුදල ද නියම කර ඇති බව සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය පාලිත මහීපාල මහතා කීවේය.
එමරෝහල්වල රසායනාගාර පරීක්ෂණ කිහිපයක් සඳහා සාධාරණ මිලක් නියම කිරීමට සෞඛ්‍ය අමාත්‍යංශය සැළසුම් කර ඇති බවත් ඒ අනුව සී.ටී ස්කෑන්, එක්ස්-රේ වැනි පරීක්ෂණ මීට ඇතුළත් වන බවෙ මහීපාල මහතා සඳහන් කළේය.
රෝහල් නියාමනය කිරීමට ද සෞඛ්‍ය අමාත්‍යංශය තීරණය කර ඇති අතර රසායනාගාර පරීක්ෂණ 33ක් සඳහා මේ වන විටත් සාධාරණ මිලක් නියම කර ඇති බව මහීපාල මහතා කියා සිටි‍යේය.
රෝහල් පරීක්ෂා කිරීම සඳහා ජ්‍යෙෂ්ට සහකාර ලේකම්වරයෙකුගේ ප්‍රධානත්වයෙන් යුත් විමර්ශන කමිටුවක් යෙදවීමට නියමිත බව ඔහු වැඩිදුරටත් කීවේය. රෝහල්හි රෝගී සත්කාරක සේවා නිවැරදි ආකාරයකට නියාමනය කර ගුණාත්මක සේවාවක් ඇති කිරීම මෙහි අරමුණ බව අධ්‍යක්ෂ ජනරාල් කීවේය.
