වාසස්ථාන අවම වීම හා ආහාර සොයා දිවියන් ජනාවාස ප්‍රදේශ වලට පැමිණීමෙන් එම සතුන් මිය යාමේ කනගාටුදායක තත්ත්වයක් ඇතිවී ඇතැයි වනජීවි දෙපාර්තමේන්තුවේ අධ්‍යක්ෂ සෞඛ්‍ය වෛද්‍ය තාරක ප්‍රසාද් මහතා පවසයි.
පසුගියදා ආගරපතන ඇල්බියන් වතුයායේදී කොටියන් දෙදෙනකු මියයාම සම්බන්ධව සොයා බැලිමට තිරසාර සංවර්ධන හා වනජීවී අමාත්‍ය ගාමිණී ජයවික්‍රම පෙරේරා මහතාගේ හා වනජීවී දෙපාර්තමේන්තුවේ උපදෙස් මත එහි ගිය වනජීවි දෙපාර්තමේන්තු වෛද්‍ය කණ්ඩායම මිය ගිය පැන්තරා පාදූස් කොටියන් දෙදෙනකු සොයා ගත් අතර හඳුන් දිවි පැටවෙකුද සොයා ගත්හ.
කොටියන් දෙදෙනා මිය ගියේ කෙසේදැයි සනාථ කර ගැනිම සඳහා පේරාදෙණිය විශ්ව විද්‍යාලයේ පශු වෛද්‍ය පීඨයට එම සිරුරු භාර දුන් බවත් එහි වාර්තාව එනතෙක් කිසිවක් ප්‍රකාශ කළ නොහැකි බවත් වෛද්‍යවරු කියති.
දිවියන් හෝ කිසියම් වනජීවියකු වස දී හෝ උගුල් අටවා මරණයට පත්කළහොත් දැඩි දඬුවම් ලබා දෙන බව වනජීවී ඇමැතිවරයා කීවේය.
මෙම සතුන් ට හානිදායක වන ක්‍රියාවක් කරන පුද්ගලයන් ගැන හෝඩුවාවක් ලබාදෙන අය සඳහා මුදල් ත්‍යාග පිරිනමන බවද අමාත්‍යවරයා පැවැසිය.
එවැනි සිද්ධියක් සම්බන්ධයෙන් “වනජීවි අපරාධයන්ට එරෙහිව මුරකාවල් පාරසරික සංවිධානය “ දුරකථන අංක 071 9005549 / 077 9495535 / 071 8114492 හා වනජීවී සංරක්ෂණ දෙපාර්තුමේන්තු හදිසි ඇමැතුම් 011 2888585 අංකවලට ඇමතිය හැකිය.
