මෙවර යල කන්නයේදී කුඹුරු අක්කර එක්ලක්‍ෂ පනස්දහසක් වස විසෙන් තොරව වගා කිරීමට සැලසුම් කර ඇතැයි ජනාධිපති උපදේශක, පාර්ලිමේන්තු මන්ත්‍රී අතුරලියේ රතන හිමියෝ පැවසූහ.
පුලතිසිපුර සේරුනුවර සිට දීඝවාපිය දක්වා කුඹුරු අක්කර ලක්‍ෂයක් සහ අනුරාධපුරය, කුරුණෑගල, පුත්තලම, හම්බන්තොට, කෑගල්ල, රත්නපුර, කළුතර සිට මඩකලපුව දක්වා කුඹුරු අක්කර 50,000ක් මෙලෙස වගා කරන බව ද කීහ.
පාරම්පරික සහ වැඩිදියුණු කළ වී වර්ගද වගා කරන බව රතන හිමියෝ කියා සිටියහ.
වස විසෙන් තොරව වගා කිරීමට කැමති ගොවීන්ට මෙම වැඩපිළිවෙල යටතේ ලියාපදිංචි විය හැකි බව කී උන්වහන්සේ මේ පිළිබඳ අවශ්‍ය තොරතුරු sema.gov.lk වෙබ් අඩවියෙන් සහ 011 2426100 දුරකථන අංකයෙන් ලබාගත හැකි බව ද පැවසූහ.
උපාය මාර්ගික ව්‍යවසාය කළමනාකරණ ආයතනයේ සභාපති අශෝක අබේගුණවර්ධන මහතා පැවසුවේ විසෙන් තොරව වී වගා කිරීමට කැමති ගොවීන්ට බිත්තර වී මෙන්ම අනෙකුත් පහසුකම දීමටත් එසේ වගා කරන වී රුපියල් 60ක සහතික මිලකට මිලදී ගැනීමටත් රජය සැලසුම් කර ඇති බවයි.
