(බිමල් ශ්‍යාමන් ජයසිංහ )
හොරණ කුඹුක පොලිස් විශේෂ කාර්ය බලකා ප්‍රභූ ආරක්ෂක පුහුණු පාසලේ වෙඩි තැබීමේ පුහුණුවක් අතරතුරදී එල්ල වූ වෙඩි ප්‍රහාරයකින් තුවාල ලද එම ප්‍රදේශයේ පුද්ගලයෙක් රෝහල්ගත කර ඇතැයි පොලිසිය කියයි.
මෙලෙස වෙඩි වැදී ඇත්තේ ගෝනපොල කුඹුක උතුර ප්‍රදේශයේ 36 හැවිරිදි පුද්ගලයකුට ය.
එම පුද්ගලයා කුඹුක සමරනායකපුර අලූත් පාර කුඹුරුයායේ පියා සහ සහෝදරයා සමඟ ගොවිතැන් කටයුතුවල යෙදී සිටියදී එකවරම ඔහුගේ වම් අතේ මාපට ඇඟිල්ල සහ දඹරගිල්ල අතර මෙන්ම දකුණු අතේ උරහිස් ප්‍රදේශයද තුවාල සිදුවී ඇති අතර අකුණක් වැදුණු බවට සිතා පියා සහ සහෝදරයා විසින් ඔහුව හොරණ දිස්ත්‍රික් රෝහලට ඇතුළත් ඇතැයි එම ආරංචි මාර්ගවලින් පැවසෙයි.
පුද්ගලයාගේ අත එක්ස්රේ පරීක්ෂණයකට භාජනය කිරීමෙන් අනතුරුව ටී 56 උණ්ඩයක් අත තුළ රැඳී තිබෙන අයුරු නිරීක්ෂණය වී ඇතැයි ආරංචි මාර්ග සඳහන් කරයි.
අනතුරුව ශල්‍ය කර්මයකට ලක්කර එම උණ්ඩය පිටතට ගෙන ප්‍රතිකාර සඳහා යොමු කළ බව ප්‍රකාශකයෙකු පැවසීය.
