බඳවා ගැනීමේ නීතිය උල්ලංඝනය කරන මිනිස්බල ආයතන කොටුකර ගැනීමේ මෙහෙයුමක් පරිපාලන සංවර්ධන, කම්කරු සහ සමාජ කටයුතු අමාත්‍යාංශය විසින් ආරම්භ කර තිබේ.
අමාත්‍යාංශයේ බඳවා ගැනීමේ දෙපාර්තමේන්තුව විසින් බඳවා ගැනීමේ ආයතන දෙකක බලපත්‍ර අවලංගු කර ඇති අතර මෙම වැටලීම් මාලාවේ ප්‍රධානම අරමුණ වන්නේ බඳවා ගැනීමේ නියෝජිතායතනවල ක්‍රියාකාරීත්වය වර්ධනය කොට ඒවා පාලනය කරන අතරම රටේ සියලුම මිනිස්බල නියෝජිතායතන බඳවා ගැනීමේ නීතියට අනුව පවත්වාගෙන යන බව තහවුරු කරගැනීමයි. සේවායෝජකයා සහ මිනිස්බල නියෝජිතායතනය අතර අස්සන් තැබෙන බඳවා ගැනීමේ ගිවිසුම නැවත නැවත උල්ලංඝනය වීමක් සිදුවුවහොත් අමාත්‍යවරයාගේ නියෝගය මත එම ආයතනයේ බලපත්‍රය තාවකාලිකව හෝ ස්ථිරවම අවලංගු කළ හැකි බව ඉහත නීතියේ සඳහන් වෙයි.
වෙනත් පාර්ශ්වයක් වෙනුවෙන් විදෙස් රටක සිට සේවකයන් බඳවා ගැනීමේදී බලපැවැත්වෙන 2005 අංක 8 දරණ අමාත්‍ය නියෝගයේ 14 වැනි වගන්තියේ සිවුවැනි ඡේදය උල්ලංඝනය කිරීම නිසා ඉහත මිනිස්බල නියෝජිතායතන දෙකේ බලපත්‍රය අවලංගු කළ බව බඳවා ගැනීමේ දෙපාර්තමේන්තුව විසින් නිකුත් කළ නිවේදනයක දැක්වේ.
මීට අමතරව ගෘහස්ථ සේවකයන් බඳවා ගැනීම සඳහා සේවායෝජකයන් සමග අස්සන් තබා ඇති ගිවිසුම පිළිපදින ලෙසට බඳවා ගැනීමේ දෙපාර්තමේන්තුව විසින් තවත් මිනිස්බල ආයතන දෙකකට අනතුරු අඟවා තිබේ.
මෙම ආයතනවලට විරුද්ධව මූල්‍ය හිමිකම් කියන අය වෙතොත් මාස තුනක් ඇතුළත අදාළ සියලු ලියකියවිලි සමගින් පැමිණ ඉදිරිපත් වන ලෙසටද දෙපාර්තමේන්තුව සියලු දෙනාගෙන්ම ඉල්ලීමක් කර ඇත.
දෙපාර්තමේන්තුව විසින් කලින් කලට ගෘහස්ථ සේවකයන් බඳවා ගන්නා මිනිස් බල ආයතන කේන්ද්‍ර කොට ගනිමින් හදිසි වැටලීම් සිදුකරනු ලබයි. බඳවා ගැනීමේ දෙපාර්තමේන්තුවේ වගකීම් අතර මිනිස්බල නියෝජිතායතනවල බලපත් සහ ඔවුන්ගේ ක්‍රියාකාරකම් නිරීක්ෂණය කිරීම, ඔවුන්ට විරුද්ධව ලැබෙන පැමිණිලි සම්බන්ධයෙන් ක්‍රියාත්මක වීම සහ මිනිස්බල ආයතන සහ ඔවුන්ගේ ගනුදෙනුකරුවන් අතර ඇතිවන ආරවුල් විසඳීම වෙයි.
