පසුගියදා පැවැති 'රයිගම් ටෙලීස්' සම්මාන උලෙළේදී වසරේ ජනප්‍රියතම නිළිය ලෙස සම්මාන දිනාගත් ශලිනි තාරකා මේ දිනවල කලා කටයුතු කිහිපයකටම සම්බන්ධ වී සිටින බව සඳහන් වේ. ඒ අතරින් ලාංකේය සිනමාව තුළ අතිශය ජනප්‍රිය වූ චිත්‍රපට කිහිපයක්ම නිර්මාණය කළ බුඩී කිර්තිසේනයන්ගේ අලුත්ම සිනමා නිර්මාණය සඳහාද ශලිනි සම්බන්ධ වී සිටියි. ඒ පිළිබඳ ශලනි අපි සමගින් අදහස් දැක්වූයේ මෙලෙසිනි.
"මේ දවස්වල ටෙලිනාට්‍ය වගේම, චිත්‍රපට කිහිපයකුත් රූපගත කිරීම් සඳහා සම්බන්ධ වෙලා ඉන්නවා. මේ දිනවල හිරු රූපවාහිනි නාළිකාවේ විකාශය වන 'වස්සානේ ප්‍රේමයයි' ටෙලිනාට්‍යයේ අවසන් රූපගත කිරීම් කටයුතු සඳහා සම්බන්ධ වෙලා වැඩ කරනවා. ඒ වගේම බුඩි කිර්තිසේන මහත්මයාගේ අලුත්ම චිත්‍රපටයේ රූපගත කිරීම් කටයුතු සඳහා සම්බන්ධ වෙලා ඉන්නවා. මේ චිත්‍රපටය වෙනස්ම තේමාවක් යටතේ නිර්මාණය වුණ අලුත්ම වැඩක්. මම රංගනයෙන් දායක වෙන හයවැනි චිත්‍රපටය මේක. ඒ වගේම මේ චිත්‍රපටයත් එක්ක මගේ චිත්‍රපට කිහිපයක්ම තව විකාශය වෙන්න තියෙනවා. මොහාන් නියාස්ගේ 'මයාවී', බෙනට් රත්නායකගේ 'මේලා' වගේම ප්‍රදර්ශනය වූ 'ස්පන්දන' චිත්‍රපටය හදන කාලෙ කරපු 'අකාර්ෂා' කියන චිත්‍රපටයත් එන්න තියෙනවා.'
බුද්ධික සේනාධීර / ඡායාරූප - ශලනිගේ ෆේස්බුක් ගිණුම
