කාලයක් බොලිවුඩ් සිනමාවෙන් ඈත්ව සිටි ප්‍රවීණ සිනමා නිළි ශ්‍රී දේවී කපූර් නැවතත් බොලිවුඩ් සිනමාවට එක්ව තිබේ. මීට දෙවසරකට පෙර ඇය රංගනයෙන් දායක වූ 'ඉංග්‍රීලිෂ් විංග්‍රීලිෂ්' චිත්‍රපටය අතිශය ජනප්‍රිය වූ අතර, එහි කළ රංගනය හරහා ශ්‍රී දේවී කපූර්ට එම වසරේ පැවති බොලිවුඩ් සිනමා සම්මාන උළෙල කිහිපයකදීම වසරේ හොඳම නිළිය ලෙස නිර්දේශයන් අතරට එක්වීමටද හැකි විය.
එළැඹෙන ජුනි 23 වැනිදා ස්පාඤ්ඤයේ රියල් මැඩ්රිඩ් නගරයේ පැවැත්වීමට නියමිත 'අයිෆා' සිනමා සම්මාන උලළේදී ශ්‍රී දේවී කපූර් ගීත කිහිපයක් සඳහා නර්තනයෙන් දායකවීමට සූදානමින් සිටින බව වෙබ් අඩවි කිහිපයකම සඳහන්. ශ්‍රී දේවී කපූර් මෙවැනි සිනමා උලෙළකට නර්තනයෙන් දායක වන්නේ වසර 15කට පසු වන අතර, බොහෝ දෙනෙකු ඇයගේ එම නර්තනය හැකියාවන් නැවත දැකබලා ගැනීමට දැඩි උනන්දුවක්ද මතුව තිබෙන බව මෙම වෙබ් අඩවි වැඩිදුරටත් සඳහන් කර සිටියි. දැනට වාර්තා වන අන්දමට මෙම සම්මාන උලෙළ සඳහා බොලිවුඩ් තරු 150කට අධික ප්‍රමාණයක්ද ප්‍රේක්ෂකයන් 20,000කට වඩා වැඩි පිරිසක්ද එක්වීමට නියමිතයි.
