ශ්‍රී ලංකා මජ්ලිස් කටාර් සංගමයේ 15 වැනි වාර්ෂික සම්මන්ත්‍රණය පසුගියදා දෝහා මැරියට් හෝටලයේදී පැවැත්වුණි. මෙවර සම්මන්ත්‍රණයේ තේමාව වූයේ “ජීවත සාරවත් කරමු” යන්නයි.
හෆීස් හුසායිර් ෆික්රෙත් විසින් සුරාහ් අර් රහ්මාන් පාඨ කියැවීමෙන් අනතුරුව සම්මන්ත්‍රණය ආරම්භ වූ අතර පැමිණ සිටි සියලු දෙනා මවිතයට පත්කරමින් ශ්‍රී ලංකාවේ සුප්‍රකට රූපවාහිනි නිවේදකයකු වන ෆයිසාල් බොංග්සෝ විසින් නිවේදන කටයුතු සිදුකළේය.
ඉන් අනතුරුව පැමිණ සිටි සියලු දෙනාව පිළිගනිමින් කතා කළ ශ්‍රී ලංකා මජ්ලිස් කටාර් සංගමයේ සභාපති හසීම් හම්සා මහතා පසුගිය වසර 15 ක කාලය තුළ අත්පත් කරගත් ජයග්‍රහණ සහ අනාගත දැක්ම ගැන පැමිණ සිටි පිරිස දැනුම්වත් කළේය.
මෙවර සම්මන්ත්‍රණයේ ප්‍රධාන ආරාධිතයා ලෙසින් සහභාගි වූ ශ්‍රී ලංකාවේ කටාර් තානාපති මහාචාර්ය ඩබ්ලිව්. එම්. කරුණාදාස මහතා පැමිණ සිට පිරිස අමතමින් ශ්‍රී ලංකා මජ්ලිස් කටාර් සංගමයේ කාර්ය භාරය අගය කළේය. එසේම ශ්‍රී ලංකා මජ්ලිස් කටාර් සංගමය කිසිදු ජාති ආගම් බේදයක් නොසළකා වෘත්තියභාවකින් යුතුව සෑම ප්‍රජාවක් සමගම සහයෝගයෙන් කටයුතු කිරීම ගැන සිය ප්‍රශංසාව පුද කළේය.
මෙවර සම්මන්ත්‍රණයේ ප්‍රධාන කථිකයා වූයේ ඉන්දීය ජාතික ලේඛකයකු මෙන්ම නායකත්ව පුහුණු උපදේශකයකුද වන ෂෙයික් මිර්සා යාවාර් බායිජ් ය. ඔහු “ජීවිත සාරවත් කරමු” යන මැයෙන් සිය දේශනය ඉදිරිපත් කළේය.
පැමිණ සිටි පිරිස ඇමැතූ ඔරීඩු සමාගමේ ප්‍රජා සම්බන්ධතා ජ්‍යෙෂ්ඨ කළමනාකාරීනි මනාර් කාලීෆා අල් මුරායිකි මහත්මිය ප්‍රජාවන් සමග සහයෝගය ඇති කරගැනීමේ ඇති වැදගත්කම අවධාරණය කරමින් ශ්‍රී ලංකා මජ්ලිස් කටාර් සංගමය විසින් ඉදිරියේදී සංවිධානය කරන ප්‍රජා වැඩසටහන් සඳහා සිය දායකත්වය ලබාදෙන බවට සහතික වූවාය.
මෙවර පළමු වතාවට ආඛා්‍යාන රචනය, කාව්‍ය රචනය සහ ප්‍රබන්ධ රචනය යන ඉසව් තුනෙන් පැවැති තරගාවලියේ ජයග්‍රාහකයන්ට “තරුණ මුස්ලිම් ලේඛක සම්මාන” ප්‍රදානය කරනු ලැබීය.
