ඉන්දියාවේ විදේශ කටයුතු ඇමැති ආචාර්ය සුබ්රමනියම් ජයශංකර් මහතා තෙදින නිල සංචාරයක් සඳහා ශ්රී ලංකාවට පැමිණීම ජාතික වශයෙන් පමණක් නොව ජාත්යන්තර වශයෙන්ද වැදගත් අවස්ථාවක් බව පැහැදිලිය. එසේ නොවන්නට පසුගිය නොවැම්බරයේ දී කෙටි සංචාරයක් සඳහා ශ්රී ලංකාවට පැමිණි ජයශංකර් මහතා යළිත් දින තුනක වැඩසටහනකට මෙරටට පැමිණෙන්නේ නැත. ඔහු මෙරටදී ජනාධිපති ගෝඨාභය රාජපක්ෂ, අග්රාමාත්ය මහින්ද රාජපක්ෂ සහ විදේශ සබඳතා අමාත්ය දිනේෂ් ගුණවර්ධන යන මහත්වරුන් සහ විපක්ෂ නායක සජිත් ප්රේමදාස මහතාත් එජාප නායක හිටපු අගමැති රනිල් වික්රමසිංහ මහතාත් හමු වූයේය. මේ නිසාම ඔහු ශ්රී ලංකාවට ලබාදෙන පණිවුඩය කුමක්ද? යන්න කාගේත් අවධානයට ලක්විය.
දෙරටේ විදේශ අමාත්යවරුන් විසින් පසුගිය බදාදා (06) පවත්වන ලද ඒකාබද්ධ මාධ්ය හමුවේ දී ඉන්දියාවේ පණිවුඩය පැහැදිලිව ජයශංකර් මහතා විසින් ප්රකාශයට පත් කෙරිණි. එය බලාපොරොත්තු වූ පරිදිම මෙරට ජාතික ගැටලුව සම්බන්ධව ඉන්දියාවේ ස්ථාවරය ඍජුවම ප්රකාශ කිරීමක් වූ අතර වත්මන් ආණ්ඩුව ඇතුළේ මතවාදී ගැටුමකට පවා හේතු වී තිබෙන පළාත් සභා ඡන්දය පැවැත්වීමේ වැදගත්කම අවධාරණය කිරීමක් ද විය. මේ සම්බන්ධව හරවත් සාකච්ඡාවක් අවශ්ය බවට ප්රබල සංඥාවක් ද එම ප්රකාශය තුළ ගැබ්ව ඇති බව ද අවබෝධ කර ගැනීම දුෂ්කර නැත.
ඉන්දීය විදේශ කටයුතු ඇමැතිවරයා එහිදී ප්රකාශ කළේ එක්සත් ශ්රී ලංකාවක් තුළ සමානාත්මතාව, යුක්තිය, සාධාරණය, අභිමානය සහ ගෞරවය සඳහා වන දෙමළ ජනතාවගේ බලාපොරොත්තු ඉටුකිරීම ශ්රී ලංකාවේ යහපතටම හේතුවනු ඇති බවය. ආණ්ඩුක්රම ව්යවස්ථාවේ 13 වැනි සංශෝධනය ඇතුළුව අර්ථාන්විත බලය බෙදීමක් සඳහා ශ්රී ලංකා රජය කරන කැපවීමට ද එය අදාළ වන බව ද ඔහු කියා තිබිණි. වාර්ගික සහජීවනය දිරිගන්වන සියලු පාර්ශ්ව ඇතුළත් වූ දේශපාලන විසඳුමක් වෙනුවෙන් සහ ශ්රී ලංකාවේ සංහිඳියා - ප්රතිසංධාන ක්රියාවලිය සඳහා ඉන්දියාව ලබාදෙන සහාය දීර්ඝ කාලීන බව ද ප්රකාශ කෙරිණි. ඒ සමඟ ඉන්දීය විදේශ ඇමැතිවරයා කියා තිබුණේ ශ්රී ලංකාවේ එක්සත් බව, ස්ථාවරත්වය සහ භෞමික අඛණ්ඩතාව වෙනුවෙන් ඉන්දියාව කැපවන බවය.
මේ අදහස් සමුච්ඡයේ අරටුව වන්නේ ශ්රී ලංකාව දෙමළ ජනතාවගේ අභිලාෂයන් කෙරෙහි සැලකිලිමත්ව කටයුතු කරනු දැකීම ඉන්දියාවේ කැමැත්ත බවය. එසේම ආණ්ඩුක්රම ව්යවස්ථාවේ 13 වැනි සංශෝධනය ඇතුළු රටේ බලය බෙදීම සඳහා පවතින ඉන්දියාවේ ස්ථාවරය මඳකින්වත් වෙනස් වී නැති බවය. ඉන්දියාවේ ආණ්ඩුවක් මාරු වූ පමණින් විදේශ ප්රතිපත්ති මාරුවන්නේ නැත. වෙනසක් සිදුවෙනවා නම් එසේ වන්නේ අදාළ කාරණාව දැඩිව සලකා බැලීමෙන් අනතුරුව පමණි. 13 වැනි ආණ්ඩුක්රම ව්යවස්ථාව සඳහා ශ්රී ලංකාව සමඟ ගිවිසුම අත්සන් කළේ ගාන්ධිලාගේ ආණ්ඩුව වීම හේතුවෙන් මෝදිලාගේ ආණ්ඩුව එය සංශෝධනය කරන්නේ නැත. ශ්රී ලංකාවේ ජාතික ගැටලුව සම්බන්ධයෙන් ඉන්දියාවේ ස්ථාවරය දේශපාලන පක්ෂයක ප්රතිපත්තියක් නොව එරටේ ප්රතිපත්තියක් බැවිනි.
දෙමළ ජනතාවගේ බලාපොරොත්තු ඉටුකිරීම ශ්රී ලංකාවේ යහපතටම හේතුවනු ඇතැයි ඉන්දියාව දැඩිව අවධාරණය කරන විට ඒ පිළිබඳව ගණන් නොගෙන සිටීමට ශ්රී ලංකාවට හැකියාවක් නැත. එසේ සිටීම නිසැකවම කලාපයේ ළඟම මිතුරා අමනාප කරගැනීමකි. එය මතුපිටින් නොපෙනෙන එහෙත් ඇතුළෙන් පවතින අමනාපයක් වීමට හොඳටම ඉඩ තිබේ. කලාපීය බලවතුන් සමඟ කටයුතු කිරීමේ දී පෙනෙන සතුරාට වඩා නොපෙනෙන සතුරා නිසැකවම ප්රබලය. ජාත්යන්තර දේශපාලනයේ දී ශ්රී ලංකාව නොබැඳි පිළිවෙතක සිටිමින් ළඟම හිතවතුන් සමඟ අන්යොන්ය සහයෝගයකින් කටයුතු කිරීම වඩාත් වැදගත් වන්නේ එබැවිනි.
අප එයින් අදහස් කරන්නේ ඉන්දියාවේ ස්ථාවරය සම්බන්ධයෙන් කලබල වී බියවී කටයුතු කළ යුතු බවක් නොවේ. රාජ්යතාන්ත්රික මට්ටමින් ඉන්දියාව පවසන දේ නිවැරදිව තේරුම් ගැනීම වැදගත් බවය. ජයශංකර් මහතා පිටත්ව ගිය සැණින් ආණ්ඩුව තීන්දු තීරණවලට එළඹිය යුතු යැයි බලකිරීමක් ද නැත. එහෙත් ඉන්දියාව පෙන්වා දෙන කරුණු සම්බන්ධයෙන් තම රට කැපවීමකින් යුතුව කටයුතු කරන බව ශ්රී ලංකාව පෙන්වාදීම අවශ්යය. ජාතික ගැටලුවට සම්බන්ධ සියලු පාර්ශ්වවලට එකඟ විය හැකි විසඳුමක් සෙවීමට ප්රමුඛත්වය ලබාදී ඇති බව පෙනෙන්නට තිබිය යුතුය.
13 වැනි සංශෝධනය ඇතුළු අර්ථාන්විත බලය බෙදීමක් සම්බන්ධව ඉන්දියාව රාජ්ය තාන්ත්රික මට්ටමින් කරුණු දක්වන විට පළාත් සභා ඡන්දය අනවශ්ය බවටත් 13 වැනි සංශෝධනය දැනටම අක්රිය වී ඇති බවටත් මෙරට වගකිවයුතු දේශපාලනඥයන් විසින් පුන පුනා පැවසීම සුදුසු නැත. ඇත්ත වශයෙන්ම පසුගිය කාලය තුළ දී එවැනි අදහස් සහ මතවාද පළ නොවූවා නම් ඉන්දියාව මේ ආකාරයේ පණිවුඩයක් ලබා දීමට ඉක්මන් නොවීමට ද ඉඩ තිබිණි. ආණ්ඩුව තවම අලුත්ය. ජනාධිපතිවරයාගේ පාලනයට ද තවම ගෙවී ඇත්තේ වසරක් පමණි. එසේ තිබියදී රටටම සංවේදී කාරණා සම්බන්ධයෙන් සිදුකරන ප්රකාශ ආවාට ගියාට කළයුතු නැත. එය නැති කරදරවලට පාවාඩ එලීමකි.
ඉන්දියාව කියන්නේ පළාත් සභා හරහා රාජ්ය බලය බෙදීමේ ක්රියාවලියකට ශ්රී ලංකාව මුල පිරිය යුතු බවය. ඒ සඳහා පළාත් සභා ඡන්දය පැවැත්විය යුතුය. එහෙත් බරපතළ ගැටලුවක් වන්නේ ඉන්දීය විදේශ අමාත්යවරයාගේ ප්රකාශය තුළ උතුරේ දෙමළ නායකයන්ගේ ඉල්ලීමක් වන එක්සත් ශ්රී ලංකාවක් තුළ බලය බෙදීම වෙනුවෙන් ඉන්දියාව පෙනී සිටින බව ද සඳහන් වීමය. ඒ ගැන පැහැදිලි තීන්දුවකට එළඹීම ද අවශ්ය බව අපගේ වැටහීමය.
(***)