තම පාක්ෂිකයනට හා සංවිධායකයනට අපමණ හිරිහැර කරද්දී ශ්‍රී ලංකා නිදහස් පක්ෂයේ 65 වැනි සංවත්සරයට සහභාගීවීම ගැන සිතා බැලිය යුතු බව මහින්ද රාජපක්ෂ හිටපු ජනපති කියයි.
සමුළුවට සහභාගි වන්නැයි ඇමැති ජෝන් සෙනෙවිරත්න පසුගියදා රාජපක්ෂ මහතාගේ නිවසටම ගොස් ඔහුට ආරාධනා පත්‍රය බාර දුන්නේය. එය ඉතා සතුටින් බාරගත් බවත් සමුළුවට සහභාගීවීමට බලාපොරොත්තුවන බවත් රාජපක්ෂ මහතා පැවසී යැයි සෙනෙවිරත්න මහතා එදිනම මාධ්‍ය හමුවේ කීවේය.
ශ්‍රී ලංකා නිදහස් පක්ෂයේ ප්‍රබලයන් පිරිසක් සංවිධායක පදවිවලින් ඉවත් කිරීමෙන් පසුව රාජපක්ෂ මහතාගේ ස්ථාවරය වෙනස්වී ඇතැයි පෙනෙතියි දේශපාලන ආරංචි කියයි. ඔහු සංවත්සරය යෙදෙන ලබන 4 වැනිදාට පෙර ඉතාලියට යෑමට නියමිත බව තානාපති ආරංචි කියයි. මහාචාර්ය ජී.ඇල්.පීරිස් ඇතුළු ඒකාබද්ධ විපක්ෂයේ මන්ත්‍රීන් කිහිප දෙනකුද සමග ඔහු සමුළුව පැවැත්වෙන සැප්තැම්බර් 4 වැනිදා ඉතාලියේ සිංහල ඩයස්පෝරාව හමුවෙතියි දැනගන්නට ඇත.
මහින්ද රාජපක්ෂ මහතාට ආසන පනවා ඇති ආකාරය ගැන ද ඔහුගේ ප්‍රසාදයක් නැතැයි දැනගන්නට ඇත. පක්ෂයේ අනුශාසකවරුන් දෙදෙනා වන චන්ද්‍රිකා කුමාරතුංග හිටපු ජනපතිනිය හා මහින්ද රාජපක්ෂ හිටපු ජනපතිට මෛත්‍රිපාල සිරිසේන ජනපතිගේ දෙපැත්තෙන් ආසන පනවා ඇතැයි ද එය එම දෙදෙනාට දැක්විය හැකි ඉහළම ගෞරවය බවද ශ්‍රීලනිප මහ ලේකම් දුමින්ද දිසානායක කියා ඇත.
මේ අතර ඒකාබද්ධ විපක්ෂයේ ප්‍රබලයකු වන විමල් වීරවංශ මහතා මාධ්‍යවේදියකු ගේ ප්‍රශ්නයකට පිළිතුරු දෙමින් පවසා ඇත්තේ අලුත් පක්ෂය පිහිටුවන දිනය පසුව දැනුම්දෙන බවයි.
