"ෆෝබ්ස්" සඟරාව විසින් පසුගිය ජූලි 18 වැනිදා නම් කළ මේ වසරේ මේ වනවිට ඉහළ ආදායමක් උපයාගත් නළු නිළියන් අතර මුල් දසදෙනා අතර, නමය හා දහය ස්ථාන දිනා ගැනීමට බොලිවුඩයේ "කිං ඛාන්" හෙවත් ෂාරුක් ඛාන් හා ආක්ෂේ කුමාර් දෙදෙනා සමත්ව ඇත.

මේ වසරේ මේ ගෙවුණු මාස 7ක කාලය තුළදී පමණක් ෂාරුක් ඛාන් ඇමෙරිකානු ඩොලර් මිලියන 33ක මුදලක් උපයාගෙන තිබේ. ආක්ෂේ කුමාර් උපයාගෙන ඇති මුදල ඇමෙරිකානු ඩොලර් 31.5ක මුදලකි. කෙසේ වෙතත්, මේ වසරේ මේ වනවිට ෂාරුක් ඛාන්ගේ "ෆෑන්" චිත්‍රපටය පමණක් තිරගත වූ අතර, ආක්ෂේගේ "එයාර් ලිෆ්ට්" හා "හවුස්ෆුල්" තුන්වැනි චිත්‍රපටය තිරගත වී ඇත. එමෙන්ම මෙම චිත්‍රපට දෙකම ඉන්දීය රුපියල් කෝටි 100කට වඩා වැඩි ආදායමක් උපයාගෙන තිබේ.

එහෙත් ආක්ෂේට වඩා ෂාරුක් ඛාන්ට ඉන්දීය වෙළෙඳ දැන්වීම් මෙන්ම රූපවාහිනි වැඩසටහන් සඳහා එක්වීමෙන් ඉහළ ආදායමක් හිමිව ඇත. මෙම "ෆෝබ්ස්" සඟරාව විසින් නම් කරනු ලැබූ ලැයිස්තුවේ පළමු ස්ථානය හිමිව ඇත්තේ ජනප්‍රිය පොප් ගායිකා ටේලර් ස්විෆ්ටය. ඇය මේ ගෙවුණු මාස 7ක කාලය තුළදී උපයාගෙන ඇති මුදල ඇමෙරිකානු ඩොලර් මිලියන 170ක මුදලකි.