‘රට පාලනය කර ගැනීමට නොහැකිව අවුරුදු දෙකකට කලින් ඡන්දයට ගොස් මහජනතාව විසින් එළවා දැමුණු මහින්ද රාජපක්ෂ කොළඹ හයිඩ් පිටියට පැමිණ යළිත් රට පාලනයට ඉල්ලා සිටිනවා. ඔහුට ඒ සඳහා ඇති සුදුසුකම් මොනවාද? ‘යැයි නිවාස ඇමැති සජිත් ප්‍රේමදාස මහතා හම්බන්තොට පැවැති රැස්වීමකදී පැවසීය.
‘නොරොච්චෝලේ නොතිබුණානම් විදුලි අර්බුදය තවත් දරුණු බව ඔහු කිව්වා. නොරොච්චෝලේ බලාගාරය ඉදිකළේ ඔහුගේ ආණ්ඩුව කාලේ. එය පනස් වතාවකට වඩා කැඩී ගියා. අධික පොලියට ණය ගෙන බර කොමිස් ගසා ඉදිකළ නොරොච්චෝලේ බාලම බලාගාරයයි. එවැනි ඉතිහාසයක් ඇති මහින්දයි රටේ පාලනය ඉල්ලන්නේ. එයාට දුන්නොත් හොඳට හිටීවි. නොරොච්චෝලේ අද අඳුරේ බලාගාරයයි. ඊට වියදම් කළ මුදල් කන්දරාව කොපමණද ? කොමිස් ගැහුවේ කවුද ? ඒ බලාගාරය ඉදිකිරීමට කලින් ඒ වෙනුවෙන් රට සවාරි ගැසූ එදා සිටි මැති ඇමැතිවරුන් කවුද ? මේ සියල්ලම ගැන පරීක්ෂා කිරීමට නොරොච්චෝලේට පමණක් ජනාධිපති කොමිසමක් පත් කරන්න ඕනෑ බව මේ රජයට යෝජනා කරනවා.‘ යැයිද නිවාස ඇමැතිවරයා කීය.
