(නිමල කොඩිතුවක්කු)
නව ප්‍රජාතන්ත්‍රවාදී පෙරමුණේ ජනාධිපති අපේක්ෂක සජිත් ප්‍රේමදාස මහතාගේ පරාජයට එක්සත් ජාතික පක්ෂයේම පිරිසක් වගකිවයුතු බව සංවර්ධන උපායමාර්ග සහ ජාත්‍යන්තර වෙළඳ කටයුතු නියෝජ්‍ය අමාත්‍ය නලීන් බණ්ඩාර ජයමහ මහතා කොළඹදී පැවැසීය.
සජිත් ප්‍රේමදාස මහතාගේ පරාජය වෙනුවෙන් කටයුතු කළ මෙම කණ්ඩායමෙන් පක්ෂය බේරා ගෙන නව ජවයක් ඇතිව ඉදිරි මහ මැතිවරණය ජය ගැනීම වෙනුවෙන් පාක්ෂිකයන් ඒකරාශී විය යුතු බවත් ඔහු සඳහන් කළේය.
කොළඹ ලෝක වෙළඳ මධ්‍යස්ථානයේ පිහිටි සංවර්ධන උපායමාර්ග සහ ජාත්‍යන්තර වෙළඳ කටයුතු නියෝජ්‍ය අමාත්‍ය කාර්යාලයේ අද(19) පැවති මාධ්‍ය හමුවකට එක්වෙමින් ඔහු මේ බව පැවැසීය.
එහිදී වැඩිදුරටත් අදහස් දැක්වූ නලීන් බණ්ඩාර ජයමහ මහතා මෙසේද කීය
“මෙවර ජනාධිපතිවරණයෙන් සජිත් ප්‍රේමදාස මහතා පරාජය කරමින් ගෝඨාභය රාජපක්ෂ මහතා වැඩි ඡන්ද ලක්ෂ 14 කින් පමණ රටේ ජනාධිපතිවරයා බවට පත් වුණා. මේ පරාජය ගැන අපි පසුවිපරමක් කළ යුතුයි.
මේ පරාජයට සෘජුවම බලපාපු කාරණය වුනේ අපේල් 21 වනදා එල්ල වූ සහරාන්ගේ ප්‍රහාරයයි. සහරාන්ගේ ප්‍රහාරයත් එක්ක ආණ්ඩුවට විශාල විරෝධයක් එල්ල වුණා.
අපි කරපු සමීක්ෂණ වලින් සිංහළ බෞද්ධ ජනතාව අතර අප්‍රේල් මාසයට කලින් සජිත් ප්‍රේමදාස මහතාත් ගෝඨාභය රාජපක්ෂ මහතාත් අතර සීයට 4ක පමණ පරතරයක් පැහැදිලිව පෙන්නුම් කළා. සහරාන්ගේ ප්‍රහාරයෙන් පසුව එම පරතරය සීයට 36 ක් වගේ ප්‍රමාණයකින් ඉහළ ගියා. ඒ නිසා මේ ජනාධිපතිවරණයේදී සහරාන්ගේ ප්‍රහාරය විශාල වශයෙන් බලපෑවා.
ඒ වගේම මැතිවරණය කටේ තියලා එම්. සී සී ගිවිසුමක් එලියට ආවා. එම්. සී. සී ගිවිසුම නුසුදුසු ගිවිසුමක් කියළා මම විශ්වාස කරන්නේ නැහැ. නමුත් මේ ගිවිසුම මගින් අක්කර ලක්ෂ ගාණක් ඇමරිකාවට දෙනවා කියළා ගෝඨාභය රාජපක්ෂ මහතා විශාල වාසියක් ගත්තා.
ඒ වගේම සජිත් ප්‍රේමදාස මහතාට මාධ්‍ය තුලින් ලැබුනෙත් ඉතා අඩු අවස්ථාවක් මෙයත් අපේ මැතිවරණ ව්‍යාපාරයට අහිතකරව බලපෑවා.
ඒ වගේම මැතිවරණ ව්‍යාපාරයේ අරමුදල් ගැන කතා කරද්දී සජිත් ප්‍රේමදාස මහතාට ප්‍රමාණවත් අරමුදල් නොතිබීම මැතිවරණ ව්‍යාපාරය ශකිතිමතත් කිරීමට බරපතල කාරණාවක් වුණා. සජිත් ප්‍රේමදාස මහතාගේ අවුරුදු 26 ක දේශපාලන ඉතිහාසය තුළ සත පහක්වත් හම්බ කර ගත්තේවත් හොරකම් කළේවත් නැහැ.
පක්ෂයට ලැබුණු අරමුදල් කවුද මෙහෙය වූයේ ඒ අරමුදල් නිසියාකාරව එකතු කරගත්තද, එම අරමුදල් මැතිවරණ ව්‍යාපාරයට යෙදෙවුවද කියන ප්‍රශ්ණයත් අපිට තියෙනවා.
ඒ වගේම සිංහළ බෞද්ධ ජනතාව පන්සල වටා ඒකරාශී වූ පිරිසක්. පහුගිය කාළයේ අපේ රජයේ යම් යම් තීන්දු නිසා සිංහළ බෞද්ධ ජනතාව අපෙන් ඈත් වෙලා ගියා. සජිත් ප්‍රේමදාස මහතා එයට වගකිවයුතු පුද්ගලයෙක් නෙමෙයි. නමුත් ඒ කරුමෙටත් එතුමන්ට කර ගහන්න සිද්ධ වුණා.
ඒ වගේම පන්සල් වලටත් එහා ගිහින් දැන් අසපු තියෙනවා. ඒ අසපු අපේ ගමේ පන්සලටත් තර්ජනයක් වෙලා තියෙනවා. ඒ අය අදහන්නේ සැබෑ බෞද්ධ ධර්මයද වෙනත් මතවාදද කියලා මම දන්නේ නැහැ. ඒ අසපු මගින් සෘජුවම සජිත් ප්‍රේමදාස මහතාට විරුද්ධව මැතිවරණ ව්‍යාපාරය මෙහෙයවූවා.
මේ ආණ්ඩුවේ අවුරුදු පහක කාළය තුළ අපේ නායකකාකාදීන් ක්‍රියාකරපු ආකාරය හැසිරුණු ආකාරය සහ බෞද්ධ විරෝධී පිරිසක් ලෙස අපිව නිර්මාණය කරපු ක්‍රියාන්විතයේ ප්‍රථිඵලයක් විදියට අපිට සිංහළ බෞද්ධ ඡන්දත් විශාල ප්‍රමාණයක් අහිමි වුණා.
මේ මැතිවරණ පරාජය පිළිබඳව තවදුරටත් පක්ෂයක් විදියට කණ්ඩායමක් විදියට පසු විපරමක් කරලා ස්වයං විවේචනයක් කළොත් තමයි අපිට මෙතනින් එහාට නිවැරදි කරගෙන ගමනක් යන්න පුලුවන් වෙන්නේ.
