(සුජිත් හේවාජුලිගේ )
හිටපු විපක්ෂ නායක සහ දෙමළ ජාතික සන්ධානයේ හිටපු නායක ආර් සම්පන්දන් මහතා ඔහු මිය යෑමට පෙර පාවිච්චි කළ විපක්ෂ නායක රජයේ බංගලාව ලබන මස 17 වැනිදා රජයට බාරදෙන බව සම්පන්දන් මහතාගේ දියණිය අධිකරණ රාජ්‍ය පරිපාලන ස්වදේශ කටයුතු පළාත් සභා පළාත් පාලන සහ කම්කරු අමාත්‍යාංශයට ලිපියකින් දැනුම්දී ඇත.
සම්පන්දන් මහතා 2015 වර්ෂයේදී විපක්ෂ නායක ධුරයට පත්වීමෙන් පසු ඔහුට මෙම නිල නිවස හිමිවිය.
2018 වර්ෂයේදී විපක්ෂ නායක ධුරය අහිමිවීමෙන් පසුවද සම්පන්දන් මහතාට මෙම නිල නිවසේ දිගටම ජීවත්වීමට අවස්ථාව ලැබිණ. ඒ යහපාලන ආණ්ඩු සමයේදී එවකට ඉඩම් අමාත්‍ය ගයන්ත කරුණාතිලක මහතා ඉදිරිපත් කළ කැබිනට් පත්‍රිකාවකට කැබිනට් මණ්ඩලයේ අනුමැතිය ලැබීමෙනි.
සම්පන්දන් මහතා මියගිය පසුගිය ජුලි මස 1 වැනිදාය. මියගොස් මාස තුනකට කාලයක් ගතවී ඇතත් තවමත් එම නිල නිවස පවතින්නේ ඒ මහතාගේ පවුලේ සාමාජිකයන් බාරයේය.
මේ අතර මෙම නිල නිවස සම්පන්දන් මහතාට දිගටම පාවිච්චි කිරීමට අවසර ලැබුණු කැබිනට් පත්‍රිකාව වෙනස් කිරීමටද රජය කටයුතු කරමින් සිටී
මෙම නිල නිවසේ ජල බිල්පත් විදුලි බිල් පත් දුරකතන බිල්පත් සහ නඩත්තු වියදම් රජය විසින් දරනු ලබන බවත් නිවසේ නඩත්තු කටයුතු කරන සේවකයන්ට වැටුප් ලබා දෙන්නේද රජයෙන් බවත් දැනගන්නට ඇත.
