ශ්‍රී ලංකා අලෙවිකරණ ආයතනය හා ලෝක ප‍්‍රකට ජනමත විමසුම් ආයතනයක් වන නීල්සන් ආයතනය සමග වාර්ෂිකව පවත්වනු ලබන ස්ලිම් නීල්සන් ජනතා සම්මාන 2016 උළෙලේදී ටෙලි නාට්‍ය අංශයේ ජනතාවගේ නළුවා ලෙස මෙවර සම්මානය හිමි වුයේ සාරංග දිසාසේකර හටය. මේ සම්මාන උළෙල පැවැත්වු මොහොතේ සාරංග සිටියේ සැතපුම් දහස් ගණනක් එහා දුරු රටකය. ඒ පුවත ඔහුට ලැබුණේ එහි සිටියදීය. මීට පෙරද මෙවැනි සම්මාන උළෙල ද්විත්වයකදීම ඔහුට ඊට සහභාගී විමට නොහැකි විය. එනිසා එදා මෙන්ම අදද ඒ සම්මාන ලබාගැනීමට වේදිකාවට ගියේ ඔහුගේ ආදරණීය මව, ප‍්‍රවීණ කලාකාරිනි තිලකා රණසිංහය. කෙසේවෙතත් තම ආදරණීය බිරිද උමාලි සහ තවත් පිරිසක් සමග මේ ජනතා සම්මානයේ සතුට ඔහු සැමරුවේ ජපානයේ සිටය. මේ දිනවල විකාශය කෙරෙන වස්සානයේ සිහිනය (හිරු) හංස පිහාටු සහ මතු සම්බන්ධයි (ස්වර්ණවාහිනිය) යන ටෙලි නිර්මාණ සහ ජූලි 7යි චිත‍්‍රපටයේ චරිතයක් සමග හමුවන සාරංග ඇයි පසුගියදා ජපානයට ගිය විශේෂ හේතුව? මොනවාද එහි ගිහින් කළේ? 2016 සඳහා ටෙලි නාට්‍ය අංශයේ ජනතාවගේ නළුවා වු සාරංග ඒ ගැන කියාවි.
සාරංග මොකද හිතන්නේ මේ සම්මාන ගැන?
ඇත්තටම හරිම සතුටුයි. ස්ලිම් නීල්සන් සම්මාන ප‍්‍රදානය සිද්ධවෙන්නේ එස්.එම්.එස් හෝ කූපන් මඟින් තෝරා ගෙන නෙවෙයි. පැහැදිලි සමීක්‍ෂණයකින් සිදු කෙරෙන සම්මාන ප‍්‍රදානයක්. ඉතින් එවැනි සම්මානයක් ලැබීම මේ යන ගමනේ ඉදිරියට තවත් ලොකු ශක්තියක් වුණා. මීට පෙරත් ස්ලිම් නීල්සන් සම්මාන උළෙලකදී මෙවරත් ජනතාවගේ රංග ශිල්පියා වූ රන්ජන් රාමනායක අයියා සමඟ මට සම්මාන ලැබී තිබෙනවා. මෙවර ලැබුණේ ටෙලිනාට්‍ය අංශයේ ජනතාවගේ නළුවා යන සම්මානයයි.
ඇයි මෙවර ජපානයට ගියේ?
කරුණු කීපයක් ඊට මුල් වී තිබුණා. එක්ස් ටී (Extea) ආයතනය සතු නී සේ (NI-CEY) ඉන්ටර්නැෂනල් ආයතනය තමන්ගේ ආයතනයේ පිරිස සඳහා ජපානයේ සංචාර මීට පෙර සංවිධානය කර තිබුණා. ඉන්පසු එයාලට පිටස්තරව ලැබුණු ප‍්‍රතිචාරත් එක්ක බොහෝ දෙනා සංචාර සඳහා ඉල්ලීම් කර තිබුණා. ඒ අනුව සංවිධානය වූ සංචාරයට මටත් උමාලිටත් ඇරයුම් ලැබුණා. ඒ නිසා ඒ පිරිස සමඟ අපත් මේ සංචාරයට එක් වුණා. ඒ වගේම තවත් විශේෂ හේතුවකුත් තිබුණා.
ඒ මොකක්ද?
අපි දෙන්නගේ විවාහයේ දෙවැනි සංවත්සරය යෙදී තිබුණේ මාර්තු 14 වැනිදාටයි. ඉතින් උමාලිට එයාගේ දෙවැනි රට වගේ වන එයා උසස් අධ්‍යාපනය ලැබූ ජපානයට ගොස් එය සැමරීමට ලැබීම විශාල සතුටකට හේතුවක් වුණා. ජපානය කියන්නේ ඍතු හතරක කාලගුණික වෙනසක් තියෙන රටක්. මේ එයාලගේ මල් පීදෙන වසන්ත කාලයයි. ජපානයටම සුවිශේෂී වූ සකුරා මල් පිපෙන වසන්ත සමයයි. ඒ සකුරා මල් උයන්වල වගේම හිම කදු අතරේත් පෞරානික හා ඓතිහාසික වටිනාකමින් යුතු ස්ථානවලත් සැරිසරමින් සුන්දර සංචාරයක අසිරිය අත් වින්දා.
ගෙවිගිය යුග දිවිය ගැන මොනවද කියන්න පුළුවන්?
අපි දෙදෙනා යුග දිවියට එළැඹුනේ හත් වසරක පමණ පේ‍්‍රම සබඳතාවයකට පසුවයි. ඒ නිසා විවාහයට පෙර හොඳ වටහා ගැනීමක් තිබුණා. එනිසා එක වහළක් යටට ආවාම එය තවත් ශක්තිමත් වුණා. විවාහයෙන් පසුව මධු සමය සඳහා උමාලිට හුරු පුරුදු ජපානයට යාමටත් ඉන්පසු ඔස්ටේ‍්‍රලියාවේ සංචාරයකටත් යාමට ලැබුණා. ඊටත් අමතරව ප‍්‍රසංග සඳහා තවත් රටවල සංචාරය සඳහා දෙදෙනාට ආරාධනා ලැබුණා. ඒ වගේම ඉතා හොඳ කලා නිර්මාණවලට දායක වීමටත් දෙදෙනාටම අවස්ථා ලැබුණා. හරි ලස්සනට ඒ කාලය ගෙවී ගියා.
මොනවාද මෙවර සංවත්සරය වෙනුවෙන් ඇයට දුන්නේ.?
දෙදෙනාටම එකටම හිටපු නිසා තෑගි තෝරා ගන්න බැරි වුණා. හැබැයි රූගත කිරීම් සඳහා දින යොදා ගෙන තිබුණු නිසා මට ලංකාවට එන්න සිදුවුණා. ඒ එන අතරමගදී මම එයාට තෑග්ගක් ගත්තා. ඒක රහසක්.
ඔබ එදා මේ සම්මානයේ සතුට බෙදා හදා ගත්තේ ජපාන සංචාරයට එක්වු පිරිස සමඟයි. එදා ඔබ උමාලි වෙනුවෙන්ම එහිදි ගීතයකුත් ගැයුවා නේද?
තාත්තාගේ ලස්සනම ලස්සන ගීතයක් තමයි ගැයුවේ.
‘ආදර නිල් දැසේ’ එම ගීතයයි. ඉතින් ආදරණීය උමාලියේ
හද ලෙන්දොර
වසනු මැනවි
මා එහි සිර කරලා’
ඒ විදිහට ආදරනීයව ගෙවී යන ඔබගේ ජිවිතයට ජූලි 7 විශේෂ වුණෙ ඇයි?
‘ජූලි 07’ අපේ‍්‍රල් 7 වැනිදා සිට තිරගත වන චිත‍්‍රපටයයි. එදා 70 දශකයේ සොඳුරු සිනමාව නැවත ‘කලූ සුදු’ පැහැයෙන් වත්මනට ගෙන ඒමට දැරූ ප‍්‍රයත්නයක්. හරි අපූරු චිත‍්‍රපටයක්. අද කාලයේ කලූ සුදු චිත‍්‍රපට නැරඹීමට ලැබෙන අවස්ථා විරලයි. මෙහි මා දායක වන්නේ ප‍්‍රහසන චරිතයකට. එනිසා එය මගේ චරිතාංග රංගනයට තවත් සුවිශේෂී දෙයක් වුණා. මේ අපූරු චිත‍්‍රපටය නැරඹීමට මා හැමෝටම ආරාධනා කර සිටිනවා.
ස්තුතිය: Ni-Cey Internation ආයතනය
