සුභාණි හර්ෂණී යනු ගායන පරපුරේ පුරුකක් ලෙස බොහෝ දෙනා දන්නා කරුණක්. ඇය මේ දිනවල අලුත් වැඩක් සඳහා දායක වෙලා තිබෙන බවද "සාරවිට" සමග පැවසුවා. මේ ඇය සමග කරනු ලැබූ කතාබහක්.
"අලුත් නිර්මාණයක් කරගෙන යනවා. ඒක බොහෝදුරට ලබන මාසෙ විතර එළියට දක්වන්න බලාපොරොත්තුවක් වෙනවා. හැබැයි ඒ ගැන දැන්මම විස්තරයක් කියන්න බැහැ. පසුගිය දවස්වල වැඩකටයුතු ගැන කියනවානම්, "ඉකි බිඳින නෙතු" ගීතයයි."ආදරෙන්" සහ "හිත කීවා" කියලා ගීත තුනක් කළා. ඒ ගීත මේ දිනවල ජනප්‍රියත්වයට පත්වෙමින් පවතිනවා. ඒ සඳහා ලැබෙන ප්‍රතිචාර හොඳ මට්ටමක තියෙනවා."
"මේ අලුතින් නිර්මාණය වන ගීතයත්, කාලීන ගීතයක් කියන්න අමාරුයි. හැබැයි හොඳ නිර්මාණයක් කියලා මම විශ්වාස කරනවා. ඊට අමතරව චිත්‍රපටයක් සඳහා සහ ටෙලිනාට්‍යයක් සඳහා ආරාධනා ලැබිලා තියෙනවා. පසුගිය දවස් කිහිපයේදී මගේ මහත්තයා සංගීතවත් කළ ටෙලිනාට්‍යයක් සඳහා ගීතයක් ගායනා කළා. ඒකේ තව එකක් සඳහා ආරාධනා ලැබිලා තියෙනවා. ඒ එක්කම මට චිත්‍රපටයක් සඳහා ආරාධනා ලැබුණා. චිත්‍රපටයේ වැඩකටයුතු පටන් අරන් තියෙන්නේ. විශේෂම දේ තමයි, මම කලා ආයතනයක් පටන් අරන් තියෙන්නේ. දැනට අවුරුද්දක් විතර එහි වැඩකටයුතු ආරම්භ කරලා."
ඩිලාන් ක්‍රිෂාන්ත
