පසුගියදා පැවැති "ස්ලීම් නීල්සන් පීපල්ස් එවෝර්ඩ්ස්" සම්මාන උලෙළේ වසරේ ජනප්‍රියම ගායිකාව ලෙස ජනතා සම්මානයෙන් පිදුම් ලැබීමට ජනප්‍රිය යොවුන් ගායිකා ශෂිකා නිසංසලාට හැකි විය. මෑත කාලයේ අතිශය ජනප්‍රිය වූ ආදර ගීත කිහිපයකම හිමිකාරිය වන ඇය "ස්ලීම් නීල්සන් පීපල්ස් එවෝර්ඩ්ස්" සම්මාන උලෙළේදී පළමු වතාවට ජනතා සම්මානය හිමිකර ගැනීම විශේෂත්වයකි. ඒ පිළිබඳව ශෂිකා "සාරවිට" සමගින් දොඩමළු වූවාය.
"ඇත්තටම, ගොඩක් සතුටුයි. මොකද ජනතාව විසින් පිරිනමන මේ සම්මානය මට පළමු වතාවට හිමිවීම. නමුත්, මා මීට පෙර හත්වරක් මේ සම්මානය සඳහා නිර්දේශ වුණා. මෙවර මා සමගින් නිර්දේශයන් අතරට ආවේ විශාරද නන්දා මාලිනි මහත්මිය හා නිරෝෂා විරාජිනි අක්කා. පසුගිය වසර කිහිපයේදීම මේ සම්මානය දිනාගත්තේ නන්දා මාලිනි මහත්මිය. මෙවරත් එතුමියත් නිර්දේශ අතරට ඇවිත් හිටිය නිසා මට තරමක් කුතුහලයක් තිබුණා මෙවර සම්මානය මට ලැබෙයිදෝ නොලැබෙයිදෝ කියලා. නමුත්, මම ගොඩක් සතුටු වුණා නිර්දේශයන් අතරට හෝ මගේ නම යෝජනා වෙලා තිබුණ හින්දා. මොකද, නිර්දේශයන් අතරට යෝජනා වෙන්නේ නම් තුනක් හෝ හතරක්නේ. ඉතින් ලංකාවේ ජනතාවගේ ආදරය දිනූ මුල් තිදෙනා හෝ සිවුදෙනා අතරට එන්නට ලැබීමත් ලොකු භාග්‍යයක්. පසුගිය කාලෙ මගේ ගීත බොහොමයක් රසික, රසිකාවියන් අතර ගොඩක් ජනප්‍රිය වුණා.
මම හිතන්නෙ මෙවර ජනතා සම්මානය මට හිමිවෙන්න ඒක හේතුවක් වෙන්න ඇති කියලා. අන්තිමට මම ගීතයක් එළිදැක්වූයේ ගිය පෙබරවාරි 14 වැනිදා. ඒ "ඇස් දෙක පුරා" කියන ගීතය. මේ දිනවල මේ ගීතය ලංකාවේ ගීත දර්ශක අතර ඉහළින්ම තියෙනවා. "ඇස් දෙක පුරා" ගීතය මේ දිනවල ජනප්‍රිය වෙලා තියෙන නිසා අලුත් ගීතයකට යන්න තවමත් අදහසක් නැහැ. බොහෝ විට මේ අවුරුද්දේ අන්තිමට වගේ මගේ අලුත් ගීතයක් එළිදකිවි.*
