ඩබ්ලිව්.ඩී. ආරියසිංහගේ පුත් හර්ෂදේව ආරියසිංහ මේ දිනවල සිය අලුත්ම ගී නිර්මාණයට සූදානමින් සිටියි. අතිශය ජනප්‍රිය ගීතයක් හා මියුසික් වීඩියෝවක් වූ "නොබලා මා දිහා" ගීතයේ මෙල් වර්ෂන් ගීතය ගායනා කරමින් බොහෝ පිරිසකගේ අවධානය දිනාගත් හර්ෂදේව "සාරවිට" අප සමගින් සිය ඉදිරි කලා කටයුතු මෙසේ පැවසීය.
"නොබලා මා දිහා^ ගීතය මගේ තුන්වැනි ගීතය. මේක ලිව්වේ සජිත් වී චතුරංග. මියුසික් කළේ කපිල්. මේ ගීතයට අදටත් ඉහළ රසික ප්‍රතිචාර ලැබෙනවා. කොටින්ම කිව්වොත් මගේ සංගීත ජීවිතෙ ලොකු වෙනසක් මේ ගීතය ජනප්‍රිය වීමත් සමග ඇති වුණා. ඒ වගේම තමයි මේ ගීතයේ මෙල් වර්ෂන් ගීතයට සමාන ජනප්‍රියත්වයක් ෆිමෙල් වර්ෂන් එකටත් ලැබිලා තියෙනවා. මට දැනගන්න ලැබුණා. මේ ගීතයේ තනුවට බංග්ලාදේශයෙනුත් ගීතයක් නිර්මාණය වෙලා තියෙනවා කියලා. ඒ වගේම ඔවුනුත් මෙල් හා ෆි මෙල් වර්ෂන් දෙකකට තමයි මේ ගීතය නිර්මාණය කරලා තියෙන්නේ. ඊට අමතරව ඉන්දියාවෙත් මේ ගීතයට අනු නිර්මාණයක් කරන්න යනවා කියලා තොරුතුරු ලැබෙනවා. "නොබලා මා දිහා" ගීතය මගේ තුන්වැනි ගීතය හා තුන්වැනි මියුසික් වීඩියෝව. මීට කලින් මම මගෙ සියාගේ ගීතයක් වුණ "දසබලධාරි" ගීතයට රීමෙක් ගීතයක් හා මියුසික් වීඩියෝවක් කළා. ඊට පස්සෙ "සංතාපයෙන්" කියලා ගීතයක් හා එයට මියුසික් වීඩියෝවක් කළා. නමුත්, විශාල රසික පිරිසක් මාව හඳුනා ගත්තෙ "නොබලා මා දිහා" බලා ගීතයෙන්. මේ ගීතය අදටත් ජනප්‍රිය වෙලා තියෙන නිසා අලුත් වැඩකට පසුගිය කාලෙ යොමු වුණේ නැහැ. ඒත්, තවත් මාසයකින් දෙකකින් අලුත් වැඩක් කරන්න සැලසුම් කරලා තියෙනවා."
