ධාරානිපාත වර්ෂාව හේතුවෙන් ඵෛතිහාසික හිඳගල රජමහා විහාරයේ සඳුන් දැවෙන් නිර්මාණය කළ බුදු පිළිමයක් කඩා වැටී ඇතැයි එහි භාර කාර සන්සුන්ගම ඥානරතන හිමියෝ කියති.
හිඳගල රජමහා විහාරයේ ලෙන් ගලෙහි ශ්‍රී ලංකාවේ එකම හා පැරණිතම සිතුවම් කිහිපයක් ඇති බව හිටපු පුරාවිද්‍යා කොමසාරිස්වරයකුවූ මහාචාර්ය සෙනරත් පරණවිතාන සහ ආනන්ද කුමාරස්ස්වාමි මහත්වරු මෙම විහාරස්ථානය නිරික්ෂණය කර පවසා ඇත.
එහි ඇති යුග 4 කට අයත් බිතු සිතුවම් ද වර්ෂාවට තෙමී හානි වන බව පුරාවිද්‍යා දෙපාර්තුමේන්තුවට හා මධ්‍යම සංස්කෘතික දෙපාර්තුමේන්තුවට ද දන්වා සිටියත් කිසිදු ප්‍රතිඵලයක් නොලැබුණු බවද ඥානරතන හිමියෝ පැවැසුහ.
ඇඹිල්මීගම පඤ්ඤාකිත්ති හිමියන් පැවැසුයේ පුරා විද්‍යා දෙපාර්තුමේන්තු නිලධාරින් පැමිණ ලෙන සහිත විහාරය සඳහා වහලයක් සැදුවත් වැස්සට ඇද හැළෙන ජලය විහාරය ඉහළින් ඇති ගල මතට වැටී මැටි බදාමයට වැටිම නිසා මැටි තට්ටුව ඇතුළෙන් ජලය කාන්දු වී සිතුවම් විනාශ විමේ තත්වයක් උදාවී ඇති බවයි.
වියලි කාලය පැමිණි විට ඒ සදහා අවශ්‍ය ක්‍රමවේදයක් අනුගමනය කර සිතුවම් ආරක්ෂා කිරිමට පියවර ගන්නා බවත් පුරාවිද්‍යා කොමසාරිස්වරයා පැවැසිය.
