ජනප්‍රිය ටෙලි නාට්‍ය කිහිපයකින්ම ඔබේ ආදරය දිනාගත් නෙතු ප්‍රියංගිකා මේ දිනවල ටෙලි නාට්‍යය ක්ෂේත්‍රය තුළ අඩුවෙන් කතාබහ වෙන යොවුන් නිළියකි. දැනට ටෙලි නාට්‍යය බොහෝ ප්‍රමාණයක රඟපෑ ඇති නෙතු "ජීවිතය ලසන්නයි" චිත්‍රපටය තුළින් සිනමාවටද එක්වූවාය. නෙතු රංගනයෙන් එක්වූ වෙළෙඳ දැන්වීම් කිහිපයක් මේ දිනවල විකාශය වන අතර, ඒ නිසාම වර්තමානයේ බොහෝ දෙනෙකු ඇයව "හෝර්ලික්ස් නංගි" ලෙසද අමතන්නට පෙළෙඹ සිටියි. ඉදිරියේදී ටෙලි නාට්‍යය කිහිපයකින්ම ඔබ හමුවට පැමිණීමට සූදානමින් සිටින නෙතු සිය අලුත්ම තොරතුරු අපට පැවසු‍වේ මෙලෙසිනි.
"පසුගිය කාලේ එක දිගට ටෙලි නාට්‍යය වලට සම්බන්ධ වුණා නිසා පොඩි වෙනසකටත් එක්ක මම මේ දවස්වල කලා ක්ෂේත්‍රයෙන් තාවකාලිව ඈත් වෙලා ඉන්නවා. ඒත්, මම රංගනයෙන් එක්වූ වෙළෙඳ දැන්වීම් කිහිපයක් මේ දිනවල විකාශය වන නිසා බොහෝදෙනෙකු ඒ හරහා මාව හඳුනාගෙන කතාබහ කරනවා. පාරතොටේදී පවා මාව දැක්කොත් බොහෝදෙනෙකු "ආ මේ හෝර්ලික්ස් නංගිනේ" කියලා මාව අමතනවා. මාව කාලයකින් ටෙලි නාට්‍ය වල දැක්කෙ නැති නිසා මගේ රසික, රසිකාවියන්ට කියන්න ඕන මගේ ටෙලි නාට්‍ය තුනක් ඉදිරියේදී විකාශය වෙන්න නියමිත වෙලා තියෙනවා කියලා. විකාශය වෙන්න නියමිත ටෙලි නාට්‍යය අතරේ එක් ටෙලි නාට්‍යයක මා ප්‍රධාන චරිතයකටත් දායක වෙනවා. එහි මා නිරූපණය කරන්නේ මාධ්‍යවේදිනියකගේ චරිතයක්. මගේ රංගන දිවියේ මා රංගනයෙන් දායක වන පළමු ටෙලි නාට්‍ය ප්‍රධාන චරිතය නිසා එය මට විශේෂ ටෙලි නාට්‍යයක්. ඉතින් මම හිතනවා බොහෝම ඉක්මනින් මේ ටෙලි නාට්‍යය හරහා නැවතත් මගේ රසික, රසිකාවියන්ට මාව දැකබලා ගන්න පුළුවන් වේවි කියලා"
බුද්ධික සේනාධීර
