කවුරුන් කෙසේ කීවත් පසුගිය ජනපතිවරණයේදී මහින්ද රාජපක්ෂ ජයගත්තා නම් රට මේ වනවිට විසාලාවක් බවට පත්ව තිබෙනු ඇතැයි මහ නගර හා බස්නාහිර සංවර්ධන අමාත්‍ය පාඨලී චම්පික රණවක මහතා අද (20) කොළඹ පදනම් ආයතනයේ දී පැවසීය.
චම්පික රණවක මහතා විසින් රචිත ‘ප්‍රවේශමෙන් මූල්‍ය අගාධයක් ඉදිරියෙනි‘ කෘතිය එළිදැක්වීමේ අවස්ථාවට එක්වෙමින් ඔහු එසේ සඳහන් කළේය.
දැනට ශ්‍රී ලංකාව විශාල ණය අර්බුදයක සිටින බවත් ආණ්ඩුවේ ආදායමෙන් සියයට 97ක් වැය වන්නේ ගත් ණය හා ඒවායේ පොළිය ගෙවීමට බවත් පෙන්වා දුන් ඇමැතිවරයා ආණ්ඩුවේ වියදම් කළමනාකරණය, ආණ්ඩුවේ ආදායම් වැඩිකර ගැනීම, ආර්ථික ඵලදායිතාවය වැඩි කරගැනීම හා ආයෝජන පරිසරය සැකසීම යන කරුණු ඔස්සේ ආර්ථික අර්බුදයෙන් රට ගොඩගන්නා ආකාරය සිය කෘතියෙන් පෙන්වා දී ඇතැයි පැවසීය.
විධායක ජනපති ධූරය සම්පූර්ණයෙන් අහෝසි කරනවාට තමා විරුද්ධ බවත් ස්වාධීන කොමිෂන් සභා පත් කළත් ඒවායෙන් නිසි ඵල ලබාගැනීමට ඒ සඳහා විධිමත් කළමනාකරණයක් පැවැතිය යුතු බවත් ඇමැතිවරයා පෙන්වා දුන්නේය.
කෘතිය එළිදැක්වීමේ උළෙලේ ප්‍රධාන දේශනය වයඹ විශ්ව විද්‍යාලයේ ආර්ථික විද්‍යාව පිළිබඳ ආචාර්ය අමින්ද මෙත්සිල සිදුකළ අතර අතුරලියේ රතන හිමි, ජනමාධ්‍ය ඇමැති ගයන්ත කරුණාතිලක, ෆීල්ඩ් මාෂල් සරත් ෆොන්සේකා, නියෝජ්‍ය ඇමැති එරාන් වික්‍රමරත්න ඇතුළු පිරිසක් එම අවස්ථාවට එක්ව සිටියහ.
