විශේෂ අවශ්‍යතා ඇති දරුවන්ට ප‍්‍රතිකාර ලබාදීම සඳහා අවශ්‍ය උපකරණ ලබාගැනීමට ආධාර පිණිස රිජ්වේ ආර්යා ළමා රෝහලේ මිතුරෝ සංගමය සංවිධානය කරන නිම්නද යාත‍්‍රා සංගීත ප‍්‍රසංගය ජූලි 16 වැනි දා සවස 6.30 ට නෙළුම් පොකුණ රඟහලේ දී පැවැත්වීමට නියමිතය.
ජනාධිපති මෛත‍්‍රීපාල සිරිසේන, සෞඛ්‍ය අමාත්‍ය රාජිත සේනාරත්න, නියෝජ්‍ය සෞඛ්‍ය ඇමැති ෆයිසාල් කාසිම් සහ සෞඛ්‍ය අධ්යක්ෂ ජනරාල් පාලිත මහීපාල හේරත් යන මහත්වරු ඇරියුම් ලබා සිටිති.
70 දශකයේ ජනප‍්‍රියත්වයට පත්වූ ගායක ගායිකාවන් වන වෝල්ටර් ප‍්‍රනාන්දු, ක‍්‍රිස්ටෝපර් පෝල්, උපාලි කන්නන්ගර, පෝල් ප‍්‍රනාන්දු, අනිල් භාරතී, ඉන්ද්‍රාණි පෙරේරා, මරියසෙල් ගුණතිලක එදින ගීතයෙන් රසවත් කරන අතර 70 දශකයේ සංගීතයෙන් පෙරැළි කළ සුපර් ස්ටාර්ස් කණ්ඩායම සමඟ ශ්‍රී ලංකන්ස් වාදන කණ්ඩායම් එදින සංගීතයෙන් රසවත් කිරීමට නියමිතය.
විශේෂ අවශ්‍යතා ඇති දරුවන් වුවද ඔවුනුත් මල් වැනි පුංචි දරුවන්ය. අනෙක් දරුවන් දුව පැන ඇවිදිනවා සේම මේ දරුවෝද දුව පැන ඇවිදින්නට බලාපොරොත්තු වෙති. ඔවුන්ගේ අනාගතය හැඩ ගන්වන්න ඔබට ලැබෙන අවස්ථාවකි.
බොරැල්ල රිජ්වේ ළමා රෝහලේ අධ්යක්ෂ වෛද්‍ය කුමාර වික්රමසිංහ මහතා :
භෞත චිකිත්සක, වෘත්තීය චිකිත්සක, කැඩුම් බිඳිම්, ලේසර් තෙරපි, මැග්නටික් තෙරපි, භාෂා හා කථන චිකිත්සකවරුන්ගේ මෙන්ම ස්නායු විශේෂඥවරුන්ට අවශ්‍ය නවීන උපකරණ මිලට ගැනීමට අපි බලාපොරොත්තු වෙන් සිටිනවා. එම උපකරණ වලින් දරුවන්ට ලබාදෙන ප‍්‍රතිකාරවල ගුණාත්මභාවය වැඩිකරගන්න හැකියාව තියෙනවා. දරුවන්ගේ ස්නායු උත්තේජනය කිරීම, තදවී ඇති සන්ධි බුරුල් කිරීම,පේශීවල තදගතිය අඩුකිරීම, මෘදු පටකවල දිග නියමිත ප‍්‍රමාණයට තබාගැනීම, මාංශපේශී ශක්තිමත් කිරීම, රුධිර ගමනාගමනය පහසු කිරීම, කථනය පහසුකිරීම සහ සන්ධිවල චලන පරාසය වැඩිකිරීම වැනි පහසුකම් එම උපකරණ වලින් දරුවන්ට ලබාදෙන්න පුළුවන්. ඒ අනුව අප රෝහල තුළින් සිදුකරන කාර්යයභාරය පිළිබවඳව සමාජයට ලොකු පණිවුඩයක් ලබාදීමටත් මෙමගින් හැකිවෙනවා. මම හිතනවා දානපතියන් මෙම කාර්ය සඳහා දායකත්වය ලබාදෙයි කියලා.
නුගේගොඩ සරසවි පොත්හල, බොරැල්ල සදීපා පොත්හල සහ බොරැල්ල ලේඩිජේ යන ආයතන වලින් ටිකට්පත් රුපියල් 1000 සිට 5000 දක්වා මිලදී ගන්න පුළුවන්. අප මිතුරෝ සංගමය සතු 8364019 ලංකා බැංකු සුපර් ගේ‍්‍රඩ් ගිණුමට ආධාර වශයෙන් ලබාදෙන මුදල් බැර කරන්න පුළුවන්. එම ලැබෙන මුදල් වලින් මිලදී ගන්නා උපකරණ අපි සියලූම අනුග‍්‍රාහකයන් ඉදිරියේදී ඔවුන්ගේ අතින්ම අදාල අංශවෙත බාරදෙන්නත් කටයුතු කරන්න සූදානමින් සිටිනවා. එවැනි ක‍්‍රියාමාර්ගයකින් ජනතාවගේ විශ්වාසය රැකගැනීම අපට වැදගත් වෙනවා. ප‍්‍රසංගයේ වැඩි විස්තර 0718152031 ප්‍රධාන භෞතික චිකිත්සක ජාලිය උඩුවැල්ල මහතා ගෙන් ලබාගත හැකියි.''
( ළමා රෝහලේ අධ්යක්ෂ වෙෙද්‍ය කුමාර වික්රමසිංහ )
