එක්සත් ජාතික පක්ෂයේ ජාතික ලැයිස්තු මන්ත්‍රීවරයෙකු ලෙස සරත් ෆොන්සේකා මහතා පත්කිරීමේ තීරණය නීතිවිරෝධී යැයි ප්‍රකාශ කරන ලෙස ඉල්ලා ගොනු කර තිබූ මූලික අයිතිවාසිකම් පෙත්සමක් විභාගයට නොගෙන ප්‍රතික්ෂේප කිරීමට ශ්‍රේෂ්ඨාධිකරණය අද (24) තීන්දු කළේය.
විකල්ප ප්‍රතිපත්ති කේන්ද්‍රය විසින් ගොනු කැරුණු පෙත්සම අගවිනිසුරු කේ.ශ්‍රීපවන් මහතා ප්‍රමුඛ ත්‍රිපුද්ගල විනිසුරු මඩුල්ලක් හමුවේ අද(24) සළකා බැලිණි.
එහිදී පෙත්සම්කාර පාර්ශවයේ නීතීඥවරයා සඳහන් කළේ එක්සත් ජාතික පක්ෂයේ සාමාජිකයකු නොවන සරත් ෆොන්සේකා එම පක්ෂයේ ජාතික ලැයිස්තුවෙන් මන්ත්‍රීවරයෙකු ලෙස පත්කිරීම නීතියට පටහැනි බවයි.
මැතිවරණ කොමිසම වෙනුවෙන් පෙනී සිටි රජයේ නීතීඥවරයා කියා සිටියේ ෆොන්සේකා මහතාගේ පත්කිරීම නිත්‍යනුකූලව සිදුකර ඇති බවයි. එයින් පාර්ලිමේන්තු මැතිවරණ පනත උල්ලංඝණය නොවන බැවින් එම පත්කිරීම සම්බන්ධයෙන් ප්‍රශ්න කිරීමට හැකියාවක් නොමැති බව ද ඔහු කීවේය.
දීර්ඝ කරුණු සළකා බැලීමකින් පසු අගවිනිසුරුවරයා ප්‍රමුඛ ත්‍රිපුද්ගල විනිසුරු මඩුල්ල සඳහන් කළේ පෙත්සම විභාග කිරීමට තරම් සාධාරණ නීතිමය පදනමක් නොමැති බවයි.
