විපක්ෂ නායක ආර්.සම්බන්ධන් සහ උතුරු පළාත් මහ ඇමැති සී.වී.විග්නේෂ්වරන්ගේ ප්‍රධානත්වයෙන් රටේ දෙමළ ජනතාවගේ ජාතික ගැටලුව විසඳා ගත නොහැකි වුවහොත් තවත් වසර ගණනාවකදී රට බරපතල අර්බුදයක් කරා ගමන් කරන බව උතුරු පළාත් සභා මන්ත්‍රී එම්.කේ.සිවාජිලිංගම් පැවසීය.
මන්ත්‍රීවරයා මේ බව කියා සිටියේ යාපනය පළාත් සභා ගොඩනැගිල්ලේ පැවැති ෆෙඩරල් යෝජනාව මාධ්‍යයට නිකුත් කිරීමේ සාකච්ඡාවකදී අදහස් දක්වමිනි.
මෙම මාධ්‍ය සාකච්ඡාවට ප්‍රථමයෙන් උතුරු පළාත් සභාවේ අනුමත කරගත් ෆෙඩරල් යෝජනාව පළාත් සභාපති සී.වී.කේ.සිවඥානම් ගේ ප්‍රධානත්වයෙන් මාධ්‍යට නිකුත් කැරිණි.
‘අපි මේ යෝජනාවලියේ කිසිදු වචනයක මේ රට බෙදන අදහසක්වත් නෑ. අපේ අදහස වන්නේ මේ රටේ ඒකීය භාවය අනුව උතුරු නැගෙනහිර එකතුකොට එකම පළාතක් වශයෙන් වෙන් කිරීමත් අනෙක් පළාත් වෙන් කිරීමේදී පළාත් කීයක්ද කියලවත් අපි කිව්වේ නැහැ. සිංහල දේශපාලඥයින් ඒක තීරණය කරයි. ඒ වගේම විශේෂ බලයකුත් අපි උතුරු නැගෙනහිරට ඉල්ලුවේ නැහැ. වෙනම රාජ්‍යක් හෝ වෙනම රටක් කියලවත් අපි උතුරු නැගෙනහිරට ඉල්ලුවේ නැහැ‘ යැයි එහිදී අදහස් දක්වමින් සිවඥානම් කීවේය.
එහිදී අදහස් දැක්වූ සිවාජිලිංගම් මන්ත්‍රීවරයා මෙසේ පැවසීය.
‘‘ඒකීය රාජ්‍යක බලය ඔක්කොම එක තැනක තියාගෙන ඉන්නේ. ඒක අපි පිළිගන්නේ නැහැ. එක්සත් ශ්‍රී ලංකාවක අපේ මේ බලය පුළුවන් තරම් බෙදිය යුතුයි. එහිදී ප්‍රධාන බලයන් තියාගත්තට කමක් නැහැ ආරක්ෂාව, වරාය, ආගමන විගමන වගේ දේවල්. ඒ නිසා අපි සිංහල ජනතාවගෙනුත් ඉල්ලීමක් කරන්නෙ අපේ යෝජනාව අපි ඉදිරිපත් කරල තියනවා ඒක පිළිගත්තොත් අපිට සාමයෙන් සමගියෙන් ජීවත් වෙන්න පුළුවන්. ඒ වගේම සම්බන්ධන් මහත්තයගෙ නායකත්වය යටතේත් විග්නේෂ්වරන් මහත්තයගේ නායකත්වය යටතේ මේ ගැටලුවට තීන්දුවක් ගන්න බැරිවුණොත් තවත් අවුරුදු 10කට 15 කට පස්සේ මේ රටේ ලොකු ප්‍රශ්නයක් ඇති වෙන්න ඉඩ තියනවා‘
