‘මෝසම් වැස්ස පටන් ගන්න ළඟයි. පවතින ආපදා තත්තවය උග‍්‍ර වෙන්න ඉඩ තිබෙනවා. කල් ඇතිව අඩුපාඩු මතුකර ඒවා හදා ගත යුතුයි. මමයි විද්‍යා තාක්ෂණ ඇමැති ලෙස කටයුතු කරද්දි ආපදා කළමනාකරණ මධ්‍යස්ථානය ආරම්භ කළේ. එය ආරම්භ කළේ ආපදාවක් ඇති වුණාම ප‍්‍රතිචාර දක්වන්න නොවෙයි. ආපදා අවම කිරීමේ අරමුණ ද ඇතිවයි. එම ආයතනය ආපදා වැළැක්වීමට බර දමා කටයුතු කළ යුතුයි. ආපදා ඇතිවෙද්දි රජයක යුතුකම කෂණික පියවර ගැනීමයි‘ යනුවෙන් ලංකා සම සමාජ පක්ෂයේ ප‍්‍රධාන ලේකම් මහාචාර්ය තිස්ස විතාරණ මහතා අද (23) කොළඹ එන්.එම්. පෙරේරා මධ්‍යස්ථානයේ පැවති මාධ්‍ය හමුවකදී පැවසීය.
‘අරනායක කඳු වළල්ලේ මෙහා පැත්ත යටියන්තොට හා බුලත්කොහුපිටියයි. කළුපහනවත්තේ 16 දෙනෙක් මිය ගියා. මේක වතු සමාගමකට අයත් වත්තක්. ඒ වතු සමාගම කි‍්‍රයා කළ ආකාරය ගැන සතුටු විය නොහැකියි‘ යැයි ද තිස්ස විතාරණ මහතා කීවේය.
