එක්සත් ජාතික පක්‍ෂය සමග ආණ්ඩු කිරීම සඳහා මුලින්ම ගිවිසුම් ගැසුවේ තමන් නොව හිටපු 2007 මාර්තු මාසයේදී ජනාධිපති මහින්ද රාජපක්‍ෂ මහතා හා රනිල් වික‍්‍රමසිංහ මහතා බව ජනාධිපති මෛත‍්‍රීපාල සිරිසේන මහතා පැවසීය.

එදා ශ්‍රී ලංකා නිදහස් පක්‍ෂයේ මහලේකම්වරයා ලෙස තමාත් එක්සත් ජාතික පක්‍ෂයේ සභාපතිවරයාව සිටි මලික් සමරවික‍්‍රම මහතාත් අරලියගහ මන්දිරයේදී එම ගිවිසුමට අත්සන් තැබූ බවද ජනපති කීවේය.

එහෙත් එම ගිවිසුම මාස ගණනකින් කැඩීයාම නිසා එක්සත් ජාතික පක්‍ෂයේ 27 දෙනෙකුට ඇමතිකම් දී ආණ්ඩුව ගෙනයාමට මහින්ද රාජපක්‍ෂ මහතා කටයුතු කළ බව කී ජනාධිපතිවරයා තමන් කළේ එක්සත් ජාතික පක්‍ෂය සමෙග එක්වීම නොව රටට නොගැළපෙන වැඩපිළිවෙළක් අවසන් කිරීම බවයි.

ජනාධිපති මෛත‍්‍රීපාල සිරිසේන මහතා මේ බව පැවසුවේකොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේදී 56 ජනතා ජයග‍්‍රහණයේ 60 වැනි සංවත්සර උළෙලේ ප‍්‍රධාන ආරාධිතයා ලෙස එක්වෙමිනි.

හිටපු ජනාධිපතිනි චන්ද්‍රිකා බණ්ඩාරනායක කුමාරතුංග, හිටපු අගමැති දි.මු ජයරත්න ඇතුළු ශ්‍රී ලංකා නිදහස් පක්‍ෂ නියෝජිතයෝ රැසක්ද උත්සවයට එක්ව සිටියහ.

56 ජනතා ජයග‍්‍රහණයේ 60 වැනි සංවත්සරය වෙනුවෙන් සමරු මුද්දරයක් නිකුත් කිරීමද මෙහි දී සිදුවිය.