අයවැයෙන් පෞද්ගලික සමාගම් ලියාපදිංචි වාර්ෂික ගාස්තුව රුපියල් හය ලක්ෂයේ සිට රුපියල් ලක්‍ෂ 5 දක්වා වැඩි කිරීමෙන් සුළු හා මධ්‍යම පන්තියේ කර්මාන්ත 5000ක් මේ වන විට සම්පුර්ණයෙන් වැසි ගොස් ඇතැයි පර්ලිමේන්තු මන්ත්‍රී බන්දුල ගුණවර්ධන මහතා අද (25) පුංචි බොරැල්ලේ පැවති මාධ්‍ය හමුවකදී පැවසීය.

‘2016 අය වැය ලේඛනය සම්පුර්ණ විහිළුවක් බවට පත්කරමින් දස ලක්‍ෂයකට රස්සා දෙනවා කිවූ ආණ්ඩුවක් රටේ සේවා නියුක්ති අවස්ථා ඇති කරන සමාගම් 5000 ක් වැසෙන මාර්ගය තැනීම අපිට තේරෙන්නේ නැහැ. මේ සමාගම් ලිපදිංචි කිරීමේ ගාස්තුවක් හදුන්වාදීමට සමාගම් පනත අනුව බලය තිබෙන්නේ සමාගම් රෙජිස්ට්‍රාර්වරයාට පමණයි. ඒ බලය මුදල් ඇමැතිවරයා බලහත්කාරයෙන් පවරාගෙන තිබෙනවා. ඒ වගේම සමාගම් වලින් මෙපණ ආදායමක් රාජ්‍ය ආදායමට ලැබෙනවා කියලා  අයවැයේ සඳහන්ව නැහැ. සමාගම් ලියාපදිංචි කිරීම සම්බන්ධයෙන් බද්දක් හදුන්වා දීමට පනත් අනුව මුදල් ඇමැතිවරයාට බලයක් නැහැ . කිසිම ආයෝජකයෙක් ලංකාව දෙස බලන්නේවත් නැති බද්දක්. ලෝකේ කොහෙවත් රටක් ලිපදිංචි ගාස්තුව මෙච්චර ගන්නේ නැහැ. එදා වැඩබිමක් වූ රට අද එක තැන නතර වෙලා තියෙන්නේ. ඒ නිසා සුළු හා මධ්‍යම පන්තියේ කර්මාන්ත කරුවාටත් අපි අපේ මැයි රැළියට කිරුළපනට එන්න කියලා කියනවා‘ යැයිද ගුණවර්ධන මහතා කීවේය.

එසේම කිරුළපන දී පැවැත්වෙන ඒකාබද්ධ විපක්ෂයේ මැයි රැලියට ශ්‍රීලනිප සභාපති ජනපති මෛත්‍රිපාල සිරිසේන මහතාට ද සහභාගී වන ලෙස ආරාධනා කරන බව බන්දුල ගුණවර්ධන මහතා සඳහන් කළේය.