උදය ගම්මන්පිල අත්අඩංගුවට ගැනීම සම්බන්ධයෙන් ජාතික හෙළ උරුමයට හා අමාත්‍ය පාඨලී චම්පික රණවක මහතාට එරෙහිව එල්ලවන චෝදනා සම්පූර්ණයෙන්ම ප්‍රතික්ෂේප කරන බවත් එය දේශපාලන පළිගැනීමක් නොව මූල්‍ය චෝදනාවක් සම්බන්ධයෙන් වන නඩුවක් බැවින් නඩු විභාගය සාධාරණව පවත්වා ඔහු වැරදිකරුවකු නම් අනිවාර්යයෙන්ම දඬුවම් කළ යුතු බවත් බස්නාහිර පළාත් සභා මන්ත්‍රී හා ජාතික හෙළ උරුමයේ මාධ්‍ය ලේකම් නිශාන්ත ශ්‍රී වර්ණසිංහ මහතා බත්තරමුල්ල, ජාතික හෙළ උරුමයේ පක්ෂ කාර්යාලයේ අද (21) පැවැති මාධ්‍ය හමුවකට පැවසීය.
‘ගම්මන්පිල අත්අඩංගුවට ගැනීමේ සිද්ධියට දේශපාලන සම්බන්ධයක් නෑ. බ්‍රයන්ස් එඩික් නමැති ඕස්ට්‍රේලියා ජාතිකයා 2015 අගෝස්තු 2 වැනිදා කළ පැමිණිල්ලක් සම්බන්ධයෙනුයි මේ විමර්ශනය සිදුකරන්නේ. තමන්ගේ යාළු මිත්‍රයන් රවටා නොමග යවා කූඨ ලේඛන සකස් කර සිදුකළ කටයුත්තක් ගැන මේ විමර්ශනය කරගෙන යනවා. අපිත් ඔහුට රැවටීම ගැන අපි තුළ ලැජ්ජාවක් කනගාටුවක් තියෙනවා. ගම්මන්පිල පසුගිය කාලේ පෙනී සිටියේ පිරිසිදු, කිරිසුදු, පිවිතුරු ඒ තරම් පාරිශුද්ධ කවුරුවත් නෑ වගේ. දූෂණ චෝදනාවලට ලක්වූවන්ට ඔහු මාධ්‍ය හමු පවත්වා දුන් චරිත සහතික අපි දැක්කා. පසුගිය කාලේ දූෂිතයන් රැකීමේ ව්‍යාපාරයේ ප්‍රකාශකයා ආරක්ෂකයා බවට ඔහු පත්වුණා‘ යැයිද වර්ණසිංහ මහතා කීය.
මේ හොරකම සම්බන්ධයෙන් සත්‍ය හෙළිදරව් කිරීම ගැන බ්‍රයන්ස් එඩික් මහතාට තමන් ස්තූතිවන්ත වන බව ද පැවසූ වර්ණසිංහ මහතා මේ සම්බන්ධයෙන් අනිවාර්යයෙන් නීතිය ක්‍රියාත්මක කළ යුතු බවත් තමන්ද මේ සම්බන්ධයෙන් සාධාරණයක් වන තෙක් බලාසිටින බවත් පැවසීය.
