ඉන්දියා රජයේ ආධාරයෙන් ඉදිකිරීමට යන සාම්පූර් විදුලි බලාගාරය මගින් පරිසරයට හානි සිදුවන බවත් එම ප්‍රදේශවල ජීවත්වන දෙමළ ජනයා මේ සම්බන්ධයෙන් තමාට දැනුම්දුන් බවත් විපක්ෂ නායක හා දෙමළ සන්ධාන නායක ආර්.සම්බන්දන් ඉන්දියන් එක්ස්ප්‍රස් පුවත්පත සමග සම්මුඛ සාකච්ඡාවකට එක්වෙමින් පවසා ඇත.
තමා ඒ සම්බන්ධයෙන් ඉන්දියාවට චෝදනා කරන බවත් සූර්ය තාපය මගින් විදුලිය නිපදවීමේ ක්‍රියාවලියක් ඇතිකිරීම පරිසරයට හිතකාරීවන බවත් සම්බන්දන් පෙන්වා දෙයි.
මේ සම්බන්ධයෙන් තමා කිසිදු පියවරක් නොගැනීම සම්බන්ධයෙන් දෙමළ ජනතාව චෝදනා කරන බවත් එබැවින් ඉන්දියාව සමග මේ පිළිබඳව සාකච්ඡා කිරීමට නියමිත බවත් ඔහු කියයි.
ඇමරිකාව පදනම් කරගත් විද්‍යාඥයන්ගේ එකමුතුව උපුටා දක්වමින් ගල් අඟුරු මගින් මෙගාවොට් 500ක විදුලිය නිපදවීමේදී සල්ෆර් ඩයොක්සයිඩ් (අම්ල වැසි ඇතිවීමට මූලිකවම බලපාන) ටොන් 10,000ක් පරිසරයට මුදාහැරෙන බව ශ්‍රී ලංකාවේ පරිසරවේදීහු පෙන්වා දෙති. ඊට අමතරව නයිට්‍රජන් ඔක්සයිඩ් (දුම් පටල ඇතිවීමට බලපායි) ටොන් 10,200ක් ද, කාබන්ඩයොක්සයිඩ් මිලියන 3.7ක් ද පරිසරයට මුදා හැරෙන බව කියති. ඒ අතර ගෝලීය උෂ්ණත්වය ඉහළ යාමට දායක වන කාබන් මොනොක්සයිඩ්, ඇතුළු කුඩා අංශුද මිනිස් ජීවිතයට මෙන්ම පරිසරයට දැඩි හානි පමුණුවන බව පරිසරවේදීන්ගේ මතයයි.
