මහින්ද රාජපක්ෂ මහතා ශ්‍රී ලංකා නිදහස පක්ෂයේ නියම නායකයෙකු නම් එකම වේදිකාවට ගොඩවී පාක්ෂිකයන්ට ශක්තිය දිය යුතු යැයි ශ්‍රී ලංකා නිදහස් පක්ෂ තරුණ පෙරමුණේ සභාපති ශාන්ත බණ්ඩාර මහතා අද(18) ඩාර්ලි පාරේ නිදහස් පක්ෂ කාර්යාලයේ පැවති මාධ්‍ය හමුවකදී පැවසීය.
‘ශ්‍රී ලංකා නිදහස් පක්ෂයේ තරුණ පෙරමුණ හැටියට අපේ පුර්ණ සහයෝගය පක්ෂයේ නායක මෛත්‍රිපාල සිරිසේන මහතා ගේ ප්‍රධානත්වයෙන් ගාල්ල සමනල ක්‍රීඩාංගණයේ පැවැත්වෙන මැයි රැලියටයි. අපි නිදහස් පක්ෂයේ තරුණයන්ට ආරාධනා කරනවා ගාල්ල සමනල ක්‍රීඩාගණයට පැමිණෙන්න කියා. විවිධ පටු ආකල්ප හා බලය රැක ගැනීම සඳහා විවිධ පුද්ගලයින් ගේ මැයි රැලිවලට යන්න එපා, අපේ පක්ෂයේ නංගිලා මල්ලිලාට කියන්නේ විවිධ කණ්ඩායම් වලට බෙදී දේශපාලන වශයෙන් අනාථයෝ වෙන්න එපා.‘ යැයිද කී ඔහු මඟුල් ගෙදර අයට මඟුල් කියන්න පමාවීම ප්‍රශ්නයක් නැතිබව ද කීවේය.
පසුගියදා මහින්ද රාජපක්ෂ මහතා කියා තිබුණේ එක දවසේ මගුල් ගෙවල් කිහිපයකට යා නොහැකි බවත් තමාට ආරාධනා ලැබුණු ඒකාබද්ධ විපක්ෂයේ මගුල් ගෙදරට යන බවත්ය. එසේම අද ඔහුට ෆැක්ස් මගින් හා ලියාපදිංචි තැපෑලෙන් ශ්‍රීලනිප මැයි රැලියට සහභාගී වන ලෙස ආරාධනා යවා ඇති බවත් ශාන්ත බණ්ඩාර මන්ත්‍රීවරයා කීවේය.
