ඒකාබද්ධ විපක්‍ෂයේ ‘ජන සටන’ පාද යාත‍්‍රාව මහනුවර නගරයට හා මාවනැල්ල නගරයට පිවිසීම වළක්වමින් අධිකරණය නියෝගයක් නිකුත් කර ඇති නිසා එය පේරාදේණියෙන් ආරම්භ කිරීමට කටයුතු කරන බව එම පා ගමනේ සංවිධායක කමිටු සභාපති පාර්ලිමේන්තු මන්ත‍්‍රී මහින්දානන්ද අලූත්ගමගේ මහතා පැවසීය.
අධිකරණය විසින් මෙම පාගමන තහනම් කර නැතැයි කී මහින්දානන්ද අලූත්ගමගේ මහතා එය මහනුවර නගරයට හා මාවනැල්ල නගරයට පිවිසීම පමණක් වළක්වා ඇති බව සඳහන් කළේය.
එම නියෝගයට ගරු කරමින් පාගමන බ්‍රහස්පතින්දා (28) පෙරවරු 9.00ට පේරාදෙණියෙන් ආරම්භ කිරීමටත්, මාවනැල්ල නගරය මගහැර විකල්ප මාර්ගයකින් පැමිණීමටත් තීරණය කර ඇතැයිද සංවිධායක කමිටු සභාපති කියා සිටියේය.
පා ගමනේ දෙවැනි දිනයේදී නෙළුම්දෙණියටත්, තෙවැනි දිනයේදී එහි සිට නිට්ටඹුවටත් සිව්වැනි දිනයේදී කිරිබත්ගොඩ දක්වාත් පැමිණ පස්වැනි දිනය වන අගෝස්තු 1 වැනිදා කිරිබත්ගොඩ සිට කොළඹ නගරයට පැමිණීමෙන් පසු එදින කොළඹදී රැළියක් පැවැත්වීමට නියමිත බව ද මන්ත‍්‍රීවරයා සඳහන් කළේය.
