‘ජනතා අවශ්‍යතාවයන් ඉටු කිරීමට බැරි වුණොත් ආණ්ඩුවෙන් යනවා‘ යැයි ප්‍රවාහන හා සිවිල් ගුවන් සේවා අමාත්‍ය නිමල් සිරිපාල ද සිල්වා මහතා බදුල්ලේ පැවැති උත්සවයකදී පැවසීය.
‘අප විසින් නිර්මාණය කරපු දේශපාලන නායකයන් පිරිසක් මෙතැන ඉන්නවා. හැබැයි ඒ අයගේ දේශපාලන විඥානය පිළිබඳව ඉදිරියේ දී අපට කල්පනා කරන්න සිදුවෙයි. තමා විසින් තමාගේම බඩ කපාගන්නා දේශපාලන නායකත්වයද එහෙම නැත්නම් දේශපාලන විරුද්ධවාදීන්ට උඩගෙඩි දෙන දේශපාලන ව්‍යාපාරද අපට අවශ්‍ය වන්නේ කියලා. එහෙම නැත්නම් සමගි වෙලා දේශපාලන පන්නරය රැකගෙන ජනතාවට සේවය කරන අයද අවශ්‍ය කියන කාරණය පිළිබඳව නිවැරදි තීරණයක් ජනතාව ගත යුතුයි‘ යැයි ද ඇමැතිවරයා කීය.
තමන් ඒකාබද්ධ රජයකට බැඳී කටයුතු කරන්නේ ප්‍රතිපත්ති පාවා දී නොවන බවත් ආණ්ඩුවට බැඳී පළාතට සේවයක් කිරීමේ අරමුණින් මිස ආණ්ඩුවේ කටු ලෙවකෑමට නොගිය බවත් ඇමැතිවරයා සඳහන් කළේය.
