(විමුක්ති එස් රුද්‍රිගු)
සිය පුරවැසියන්ට හොඳ අනාගතයක් ගොඩ නගාදීම සඳහා ජාත්‍යන්තර මූල්‍ය අරමුදල ශ්‍රී ලංකාවට සැමවිටම සහාය ලබාදෙන බව එම අරමුදලේ කළමනාකරණ අධ්‍යක්ෂිකා ක්‍රිස්ටලිනා ජෝර්ජියේවා මහත්මිය ප්‍රකාශ කළාය.
ජාත්‍යන්තර මූල්‍ය අරමුදල මෙරටට ලබාදී ඇති වැඩසටහන යටතේ ශ්‍රී ලංකාව ලබාගත් ජයග්‍රහණ ඉදිරියට ගෙන යාම සඳහා අඛණ්ඩව ප්‍රතිසංස්කරණ ක්‍රියාත්මක කිරීමට මෙරට බලධාරීන්ගේ කැපවීම දිරිමත් කරන බවද ජෝර්ජියේවා මහත්මිය පැවැසුවාය.
මහ බැංකු අධිපති ආචාර්ය නන්දලාල් වීරසිංහ සහ මුදල් අමාත්‍යාංශ ලේකම් මහින්ද සිරිවර්ධන ඇතුළු ශ්‍රී ලංකික දූත පිරිස සමග පසුගියදා ඇමෙරිකාවේ වොෂින්ටන් නගරයේදී පැවැති සාකච්ඡාවකදී ඇය මෙම අදහස් පළ කළාය.
