පෝර මිල ඉහළයෑමත්, අමු තේ දලූ මිල පහත වැටීමත් සහ පවතින දැඩි නියඟයත් සමඟ ප‍්‍රමාණවත් අමු තේ දලූ නොලැබීමෙන් රත්නපුර දිස්ත‍්‍රික්කයේ තේ කම්හල් වැසියාමේ දැඩි අවදානමකට ලක්ව ඇතැයි තේ කම්හල් හිමියෝ පවසති.
වැවිලි සමාගම් සහ පෞද්ගලික අංශ වලට අයත් තේ කම්හල් සියයකට වැඩි ප‍්‍රමාණයක් රත්නපුර පිහිටා ඇත. කොළඹ තේ වෙන්දේසියට ඉදිරිපත් කෙරෙන තේ ප‍්‍රමාණය සතියෙන් සතිය පහළ යමින් පවතින බවද ඔවුහු කියති.
තේ කම්හල් ආශ‍්‍රිත රැකියාවල නිරත පිරිස් වලට වැටුප් ගෙවීම් පවා ගැටලූවක්ව ඇති බව පවසන තේ කම්හල් හිමියන්, අනියම් සහ කොන්ත‍්‍රාත් පදනම මත කම්හල් වලට ලබා ගන්නා සේවාවන් සහ රැකියා අවස්ථා නවතා දැමීමට පියවර ගෙන ඇතැයි කීහ.
තේ වෙන්දේසියට ඉදිරිපත් කෙරෙන තේ ප‍්‍රමාණය ශිඝ්‍ර ලෙස අඩුවෙමින් යද්දී තේ කිලෝවක මිල සුළු ප‍්‍රමාණයකින් ඉහළ ගිය ද කුඩා තේ වතු හිමියෝ තේ අර්බුදය හමුවේ විශාල ආර්ථික අපහසුතාවකට ලක්වී සිටිති.
