හොර්ටන්තැන්නෙන් ආරම්භවී බෙලිහුල්ඔය හා ඉහළමස්සැන්නෙන් ආරම්භ වන දොරවෙල ඔයේ දූවිලි ඇල්ල ආශ්‍රිතව ඉදිවීමට යෝජිත පෞද්ගලික ජලවිදුලි බලාගාරයකට බළන්ගොඩ කල්තොට ජනතාව විරෝධය පළ කරති.
ජෛව විවිධත්වයෙන් අනූන සොඳුරු පරිසර පධතියත්, එහි ජීවත්වන වන සත්වයින් මෙන්ම වෘක්ෂලතාවන්ද ගඟ ආශ්‍රිතව ආවේණික මිරිදිය මත්ස්‍ය සම්පත ද අහිමිවීමේ අවදානමක් ඇතිවී තිබෙන බව කල්තොට ශාසනාරක්ෂක බලමණ්ඩලයේ සභාපති වැලිපත සුමනරතන, බුදුගල සෝමරතන, වේලිඔය සුමේධාලංකාර යන ලේඛකාධිකාරි හිමිවරු ඇතුළු වලවේ ගඟ සුරැකීමේ සංවේදී පරපුර සංවිධානය පෙන්වාදෙයි.
දූවිලි ඇල්ල පාමුල ජලයෙන් ඉදිකිරීමට යෝජීත මෙම ව්‍යාපෘතියෙන් මෙගාවෝට් 1.5 විදුලිබලයක් නිපදවන බව කියන අතර මෙම ඉදිකිරීමෙන් පසුව ගඟ කිලෝමීටර් 2 ක පමණ කුඩා දියපහරක් පමණක් වනු ඇති බව සහ පෝෂිත ප්‍රදේශයේ කෙත්බිම් අක්කර 1500 ක් වැනසීයනු ඇති බවද කියති.
රත්නපුර දිස්ත්‍රික් ලේකම් බන්දුල හරිස්චන්ද්‍ර මහතා ඒ ගැන මෙසේ කීවේය. ‘අවසරදීම් හා අවසරගැනීම් අපි හරහා ගිහින් නැහැ. අපි හරහා යන්නෙ නැහැ. ප්‍රාද්ශීය ලේකම් අපට වාචිකව දන්වා තිබෙනවා මහජන විරෝධයක් ඇවිත් තියන බව. මේ මහජන විරෝධ පිළිබඳ ජනාධිපති ලේකම් කාර්යාලයේ පවතින පරිසර කමිටුවේදී සාකච්ඡා කරන්න බලාපොරොත්තු වෙනවා. පුනරුදය වැඩසට යටතේ විශේෂ පරිසර බලකායක් තිබෙණවා. ලබන සතියේ අපි ඒගැන කථාකරනවා. විදුලිබල අමාත්‍යාංශය යටතේ පුණර්ජනනීය බලශක්තිය පිළිබඳ ඒකකය වන සුනිත්ත බලඅධිකාරිය යටතේ පවතිනවා ගංගා කුඩාදියඇලි අසුරින් ජලවිදුලිය නිපදවන වැඩපිළිවෙලක් ඒ යටතේ තමයි යන්නේ. ඊට පනතක් තිබෙණවා. ඒ යටතේ ක්‍රියා කළයුතුයි‘
