දේශපාලන සිරකරුවන් නිදහස් කරන ලෙස ඉල්ලමින් සිවිල් සංවිධාන නියෝජිතයෝ හා සමාජ ක්‍රියාකාරීහු පිරිසක් අද වැලිකඩ බන්ධනාගාරය ඉදිරිපිට විරෝධතාවක් පැවැත්වූහ.
එක්සත් සමාජවාදී පක්ෂය, නව සම සමාජය පක්ෂය, සමාජවාදී පක්ෂය, නව ප්‍රජාතන්ත්‍රවාදී පක්ෂය ආදී දේශපාලන පක්ෂ ද, වමේ හඩ, සම අයිතිය ව්‍යාපාරය, අලුත් පරපුර, ලංකා ගුරු සංගමය ආදී සිවිල් සංවිධාන හා වෘත්තීය සිමිති නියෝජිතයෝ පිරිසක් ද ඊට එක්වූහ.
නඩු නොදමා වසර ගණනාවක් තිස්සේ බන්ධනාගාර ගත කර සිටින දේශපාලන සිරකරුවන් මුදා නොහැරීම නිසා ඔවුන්ගේ මානව හිමිකම් කඩවන බව විරෝධතාකරුවෝ කීහ.
අන්තර් විශ්ව විද්‍යාලය ශිෂ්‍ය බල මණ්ඩලයේ හිටපු කැඳවුම්කරු මෙන්ම අක්ෂය සංවාද මණ්ඩපයේ ක්‍රියාකාරිකයකු ද වන නජිත් ඉන්දික මහතා කීවේ එල්ටීටීඊයේ ප්‍රධානීන් නිදැල්ලේ සිටියදී ඔවුන්ගේ කීමට වැඩ කළ ඇතැමුන් සිර කරගෙන සිටින බවයි. ඇතැම් දේශපාලන සිරකරුවන් සිය ජීවිතයේ වැඩි කාලයක් ගෙවා ඇත්තේ බන්ධනාගාරයේ බව ද ඔහු කීවේය.
ඡායාරූප හා වීඩියෝ - කෞශල්‍ය සමින්ද
