දැන් මහින්ද රාජපක්ෂ මහතාගේ ආරක්ෂාව ගැන කලබල වී සිටින පිරිස් මහින්ද රාජපක්ෂ ජනාධිපතිව සිටි සමයේ හිටපු ආරක්ෂක ඇමති අනුරුද්ධ රත්වත්තේ මහතාට හා හිටපු ජනාධිපතිනී චන්ද්‍රිකා කුමාරතුංග මැතිනියට ලබා දුන් ආරක්ෂාව පිළිබඳව කල්පනා කළ යුතුව ඇතැයි සමාජ සවිබල ගැන්වීම් හා සුභසාධන අමාත්‍ය එස්.බී.දිසානායක මහතා පැවසීය.
ඇමතිවරයා එසේ පැවසුවේ අද (04) කොළඹ ශ්‍රාවස්ති මන්දිරයේ පැවති මාධ්‍ය හමුවකදීය.
ශ්‍රී ලංකා බුද්ධි අංශ මහින්ද රාජපක්ෂ මහතාගේ ආරක්ෂාව කිසි විටක අවතක්සේරු නොකරනු ඇතැයි තමන් වි‍ශ්වාස කරන බවත් ඇමැතිවරයා මාධ්‍ය හමුවේදී සඳහන් කළේය.
‘අතීතයේදී පාර්ලිමේන්තුවේ මෙවැනි සිදුවීම් වෙලා තියෙනවා. ඒත් කව්රුත් අතපය පාවිච්චි කරලා නැහැ. අතපය පාවිච්චි කරන්න දන්න කව්රුහරි අතපය පාවිච්චි කළොත් ඔය ඊයේ අතපය පාවිච්චි කරපු අය කොහෙද ඉන්නේ කියල දන්නේ නැහැ. ඒ නිසා පාර්ලිමේන්තුවේදී අතපය පාවිච්චි කරන්න හොඳ නැහැ.‘ යැයි ඇමැතිවරයා පාර්ලිමේන්තුවේ සිදුවූ ගුටිබැට හුවමාරුව සම්බන්ධයෙන් අදහස් දක්වමින් පැවසීය.
‘අපේ පාර්ලිමේන්තු ඉතිහාසය එතරම් කැත නැහැ. මන්ත්‍රීවරුන්ට බිමදාගෙන ගහන්න තරම් අතීතයේ මන්ත්‍රීවරු වනචර වෙලා නැහැ. පාර්ලිමේන්තුවේ ලේ වගුරපු පළමු අවස්ථාව මේක. මේ ගැන ලැජ්ජා විය යුතුයි. ඒ වෙලාවේ පාසැල් දරුවෝ හිටියා. ඒ අය ඉවත් කරන්නත් සිදු වුණා. පාර්ලිමේන්තුව කියන්නේ ජනතාව වෙනුවෙන් ප්‍ර‍තිපත්ති හදන උත්තරීතර තැන. මෙතනට එන තැනැත්තා ගෞරවනීය තැනැත්තෙක් විය යුතුයි. ඔහු රස්තියාදු කාරයෙක්, ගංජාකාරයෙක්, කසිප්පුකාරයෙක්, තගෙක් නෙවෙයි.‘ යැයි ද ඇමැතිවරයා පැවසීය.
ප්රශ්නය - මේ ගැන නීතිමය පියවර ගන්න පුළුවන්ද?
පිළිතුර - කථානායකවරයා ඒ ගැන තීරණය කරාවි.
ප්රශ්නය - මීට කළින් පාර්ලිමේන්තුවේදී හාමුදුරු කෙනෙක් මන්ත්‍රීවරයෙකුගේ යටිබඩ මිරිකල සිද්ධියක් වුනා. එය බරපතල නැත්ද ?
පිළිතුර - ඒක ඉතා රහසිගතව කළ දෙයක් නේ. මේ වගේ ප්‍ර‍සිද්ධියේ කරපු දෙයකුත්, චන්ඩිකමට කළ දෙයකුත් නොවේ.
ප්රශ්නය - මෙවැනි සිද්ධීන් වෙන්නේ කරු ජයසූරිය කථානායක තුමාගේලිහිල් ප්‍ර‍තිපත්ති නිසා නේද? චමල් රාජපක්ෂ මහතා කථානායක වී සිටින විට මෙහෙම වුනේ නෑ නේද?
පිළිතුර - නැහැ එදා ආණ්ඩුව ඉතා ශක්තිමත්. විපක්ෂය දුර්වල වෙලා තිබුනේ. අද ශක්තිමත් විපක්ෂයක් තියෙනවා.
ප්රශ්නය - මේ සිද්ධියට සම්බන්ධ වු ශ්‍රීලනිප මන්ත්‍රීවරුන්ට එරෙහිව පක්ෂය විනය පියවර ගන්නවාද?
පිළිතුර - ඔව් මේ ගැන ක්‍රියා කරන්න පක්ෂයට අයිතියක් තියෙනවා. එවැනි අයව පක්ෂයෙන් ඉවත්කරන්න බලය තියෙනවා. ඉවත් කළොත් මන්ත්‍රීකමත් නැතිවෙනවා.
