දියවැඩියාව වැනි බෝ නොවන රෝග වසංගතයක් ලෙස පැතිරෙමින් පවතින බවත් වකුගඩු රෝගීන්ගේ සංඛ්‍යා දත්ත බලන විට බියක් ඇති වන බවත් රජයේ වෛද්‍ය නිලධාරීන්ගේ සංගමයේ සභාපති ළමා ස්නායු රෝග පිළිබඳ විශේෂඥ වෛද්‍ය අනුරුද්ධ පාදෙණිය මහතා පැවසීය.
කොළඹ ජාතික පුස්තකාල ශ්‍රවණාගාරයේ පැවැති සදීපා පොත් ප්‍රකාශකයන් විසින් ‘නිරෝගී දිවියකට‘ පොත් පෙළෙහි දෙවැනි අදියර එළිදැක්වීමේ උළෙලේ ප්‍රධාන දේශනයට එක්වෙමින් පාදෙණිය මහතා එසේ කීවේය.
පරිසර හිතකාමී හෙවත් එකෝ ෆ්‍රී යන බටහිර සංකල්ප මෙරට යළි ක්‍රියාත්මක කරන්න උත්සාහ කළත් එය ඈත අතීතයේ සිට අපේ රටේ ජනතාව අතර නිරායාසයෙන් ක්‍රියාත්මක වූවක් බවද පෙන්වා දුන් පාදෙණිය මහතා පාණාතිපාතා වේරමණී සිල් පදයේ සිට පරිසරයට ආදරය කළ කෘෂිකාර්මික දිවි පෙවතක් ගත කළ පැරැන්නන්ගේ ජීවන රටාවට යළි හුරුවීමෙන් ලෙඩ රෝග අවම කරගත හැකි බවද කීවේය.
භෞත චිකිත්සක ජාලිය උඩුවැල්ල මහතාගේ භෞතචිකිත්සාව, පෝෂණවේදී රොෂාන් දෑල බණ්ඩාර මහතාගේ නිවැරදි ආහාර පුරුදු, විශේෂඥ වෛද්‍ය අනිල් සමරනායක හා මාධ්‍යවේදිනී නාලිකා රාජපක්ෂ සංස්කරණය කළ තරබාරුවෙන් අත්මිදෙමු, වෛද්‍ය ශාන්ත හෙට්ටිආරච්චි මහතාගේ යොවුන් වියට ලිංගික අධ්‍යාපනය, යෝගාචාර්ය රෝලන්ඩ් විතානගේ මහතාගේ ගත සිත සනසන යෝග ව්‍යායාම, වෛද්‍ය උපාලි වේරගම මහතාගේ ජීර්ණ පද්ධතිය ආශ්‍රිත රෝගවලින් අත්මිදෙමු ඇතුළු ග්‍රන්ථ 8ක් එහිදී එළි දැක්විණි.
