ව්‍යවස්ථාදායක සභාව පොලිස්පතිධුරය සඳහා ජ්‍යෙෂ්ඨ නියෝජ්‍ය පොලිස්පති පූජිත් ජයසුන්දර මහතා නිර්දේශ කළ ආකාරය නීත්‍යනුකූලවත් සදාචාරය අනුවත් වැරැදි යැයි එක්සත් ජනතා නිදහස් සන්ධානයේ පාර්ලිමේන්තු මන්ත්‍රී උදය ගම්මන්පිල මහතා අද (19) පැවැසීය.
ආණ්ඩුක්‍රම ව්‍යවස්ථාවේ 41 (ඈ) (1) වගන්තිය ප්‍රකාරව ජනපතිවරයා විසින් ව්‍යස්ථාවදායක සභාවට පොලිස්පත්ධුරය සඳහා නමක් යෝජනා කළ පසු ව්‍යවස්ථාදායක සභාව කළ යුත්තේ එම නම අනුමත කිරීම හෝ ප්‍රතික්ෂේප කිරීම යැයි ද, නීතිපතිවරයා තෝරාගත් ආකාරයත් පොලිස්පතිවරයා තෝරාපත් ආකාරයත් පරස්පර යැයි ද ඒ පත්කිරීම් දෙකම නීතිවිරෝධි යැයි ද ඔහු කීවේය.
පිවිතුරු හෙළ උරුමයේ පිටකෝට්ටේ පක්ෂ කාර්යාලයේ පැවැති අද (19) පැවැති මාධ්‍ය හමුවකදී උදය ගම්මන්පිල මහතා එගෙස පැවසීය.
‘අපට නව වසරේ ලැබුණේ අසුබදායක පුවතක්. ජනපතිවරයා නමක් නිර්දේශ කළාම ව්‍යවස්ථාදායක සභාව කරන්නේ ඒ නම අනුමත කිරීම හෝ ප්‍රතික්ෂේප කිරීමයි. මීට මාස දෙකකටත් අඩු කාලයකට පෙර නීතිපතිවරයා පත් කිරීමේදී ජනපතිවරයා ව්‍යවස්ථාදායක සභාවට නම් තුනක් යෝජනා කළා. එතකොට ව්‍යවස්ථාදායක සභාව ජනපතිවරයාට දැනුම් දුන්නා නමක් තෝරා දෙන්න කියා. ඔවුන්ට කළ හැක්කේ ජනපතිවරයා යෝජනා කරන නම අනුමත කිරීම හෝ ප්‍රතික්ෂේප කිරීම යැයි ඔවුන් එහිදි ජනපතිට කිව්වා. ඔවුන්ට නම් තේරීම කළ නොහැකි බව ඔවුන් පවසා සිටියා.
ඒත් පොලිස්පතිවරයා තෝරන්නේ එදා වැරැදියි කියපු විදියට. ව්‍යවස්ථාදායක සභාවට ඔවුන් එදා හිටපු ස්ථාවරය අමතක වෙලා. නැතිනම්, බලෙන් අමතක කරලා. එදා ජනපතිවරයා නීතිපති තනතුරට ජයන්ත ජයසූරිය මහතාගේ නම යෝජනා කළාම, ව්‍යවස්ථාදායක සභාවට එය අනුමත කළා. එහෙත් පොලිස්පතිවරයා තේරීමේදීත් ජනපතිවරයා ඒ වැරැද්දම කළාම, ව්‍යවස්ථාදායක සභාව ඔවුන්ට අවශ්‍ය නමක් තෝරනවා. එදා වැරැදි වුණාට අද වැරැදි යන අදහස එයින් ඇඟවෙනවා.
අපිට ආරංචි විදියට ජනපතිවරයා හා අගමැතිවරයා පොලිස්පතිධුරයට නම් දෙකක් පිළිබඳ යෝජනාවක් තිබිලා තියෙනවා. නැවත ජනපතිවරයාට යැව්වොත් අපට අවශ්‍ය නම එන එකක් නැතැයි කියන බිය ව්‍යවස්ථාදායක සභාවට ඇතිවෙන්න ඇති.
මීට පෙර නීතිපතිවරයා පත් කිරීමේදීත් ජ්‍යෙෂ්ඨත්වය සලකන්නැයි අපි කිව්වා. නියෝගයක් දුන්නාම සුවච කීකරු ගෝලයෙක් ලෙස එය ඉටු කරනවා ද? උදේට ‘ගුඩ් මොර්නින්‘ සර් කියනවාද යන නිර්ණායක මත නීතිපති, පොලිස්පති වගේ තනතුරුවලට පුද්ගලයන් පත් කරන්න බැහැ. මේ ව්‍යවස්ථාදායක සභාව මුණ ලස්සන වුණාට ඇතුළේ අවුල්.‘
